jism ke is khanDar ki tanhai

jism ke is khañDar kī tanhā.ī

aur ye raat bhar kī tanhā.ī

ek tasvīr bhī nahīñ ghar meñ

uf ye dīvār-o-dar kī tanhā.ī

koī aahaT na koī saaya hai

har qadam hai safar kī tanhā.ī

ek aalam ko hai sameTe hue

merī fikr-e-nazar kī tanhā.ī

merī sāñsoñ meñ bas ga.ī jaise

jān-o-dil kī jigar kī tanhā.ī

kitnī bezār hai ye mausam se

samar-āvar shajar kī tanhā.ī

dekhtā hai nikal ke sūraj roz

ye mire bām-o-dar kī tanhā.ī

raat din rote hai dar-o-dīvār

khā ga.ī mujh ko ghar kī tanhā.ī

zindagī ke safar meñ ai 'arpit'

dekh lī dar-ba-dar kī tanhā.ī

jism ke is khanDar ki tanhai

aur ye raat bhar ki tanhai

ek taswir bhi nahin ghar mein

uf ye diwar-o-dar ki tanhai

koi aahaT na koi saya hai

har qadam hai safar ki tanhai

ek aalam ko hai sameTe hue

meri fikr-e-nazar ki tanhai

meri sanson mein bas gai jaise

jaan-o-dil ki jigar ki tanhai

kitni bezar hai ye mausam se

samar-awar shajar ki tanhai

dekhta hai nikal ke suraj roz

ye mere baam-o-dar ki tanhai

raat din rote hai dar-o-diwar

kha gai mujh ko ghar ki tanhai

zindagi ke safar mein ai 'arpit'

dekh li dar-ba-dar ki tanhai