jitna tahzib-e-badan se main sanwarta jaun

jitnā tahzīb-e-badan se maiñ sañvartā jā.ūñ

utnā hī TuuT ke andar se bikhartā jā.ūñ

zindagī jaise calendar pe badaltī tārīḳh

maiñ shab-o-roz ke mānind guzartā jā.ūñ

kyā patā ḳhvāboñ kī ta.abīr mile yā na mile

kisī kāġhaz pe unheñ note hī kartā jā.ūñ

sehn-e-gulshan se vo ik āḳhirī rishta bhī gayā

ḳhushk pattoñ kī tarah ab to bikhartā jā.ūñ

tah-e-zulmāt in ā.ankhoñ ke diye jalte jaa.eñ

ziina ziina maiñ ujāloñ meñ utartā jā.ūñ

gard-e-dāman kī tarah mujh ko uḌāne vaale

aks ban kar tirī ā.ankhoñ meñ Thahartā jā.ūñ

kitne ghabrā.e hue haiñ mire qātil 'mohsin'

āstīnoñ pe lahū ban ke ubhartā jā.ūñ

jitna tahzib-e-badan se main sanwarta jaun

utna hi TuT ke andar se bikharta jaun

zindagi jaise calendar pe badalti tariKH

main shab-o-roz ke manind guzarta jaun

kya pata KHwabon ki tabir mile ya na mile

kisi kaghaz pe unhen note hi karta jaun

sehn-e-gulshan se wo ek aaKHiri rishta bhi gaya

KHushk patton ki tarah ab to bikharta jaun

tah-e-zulmat in aaankhon ke diye jalte jaen

zina zina main ujalon mein utarta jaun

gard-e-daman ki tarah mujh ko uDane wale

aks ban kar teri aaankhon mein Thaharta jaun

kitne ghabrae hue hain mere qatil 'mohsin'

aastinon pe lahu ban ke ubharta jaun