jitne moti gire aankh se jitna tera KHasara hua

jitne motī gire aañkh se jitnā terā ḳhasārā huā

dast-basta tujhe kah rahe haiñ vo saarā hamārā huā

aa girā zinda shamshān meñ lakḌiyoñ kā dhuāñ dekh kar

ik musāfir parinda ka.ī sard rātoñ kā maarā huā

ham ne dekhā use bahte sapne ke arshe pe kuchh der tak

phir achānak chahakte samundar kā ḳhālī kinārā huā

jā rahā hai yūñhī bas yūñhī manzileñ pusht par bāñdh kar

ik safar-zād apne hī naqsh-e-qadam par utārā huā

zindagī ik juā-ḳhāna hai jis kī fōtpath par apnā dil

ik purānā juārī musalsal ka.ī din kā haarā huā

tum jise chāñd kā chāñd kahte ho 'mansūr-āfāq' vo

ek lamha hai kitne musībat-zadoñ kā pukārā huā

jitne moti gire aankh se jitna tera KHasara hua

dast-basta tujhe kah rahe hain wo sara hamara hua

aa gira zinda shamshan mein lakDiyon ka dhuan dekh kar

ek musafir parinda kai sard raaton ka mara hua

hum ne dekha use bahte sapne ke arshe pe kuchh der tak

phir achanak chahakte samundar ka KHali kinara hua

ja raha hai yunhi bas yunhi manzilen pusht par bandh kar

ek safar-zad apne hi naqsh-e-qadam par utara hua

zindagi ek jua-KHana hai jis ki footpath par apna dil

ek purana juari musalsal kai din ka haara hua

tum jise chand ka chand kahte ho 'mansur-afaq' wo

ek lamha hai kitne musibat-zadon ka pukara hua