jo aane wale dinon ko gulab dekhna hai

jo aane vaale dinoñ ko gulāb dekhnā hai

to aao tai ye kareñ ab se ḳhvāb dekhnā hai

vo aur hoñge jinheñ intiḳhāb dekhnā hai

hameñ to bhaa.ī faqat intisāb dekhnā hai

hamārā sirf hamārā bayān ho jis meñ

kitāb-e-'ishq meñ ik aisā baab dekhnā hai

hisāb apne gunāhoñ kā kyoñ rakheñ jab ki

hameñ tirā karam-e-be-hisāb dekhnā hai

havas ġhurūr raqābat fasād bechainī

hamāre bachchoñ ko kyā kyā 'azāb dekhnā hai

jo saañs liije to farhat jo chhoḌiye to sukūñ

vo daur aa.egā kab ye janāb dekhnā hai

nafas nafas meñ ho ḳhushbū mohabbatoñ kī 'obaid'

tamām 'umr yahī ek ḳhvāb dekhnā hai

jo aane wale dinon ko gulab dekhna hai

to aao tai ye karen ab se KHwab dekhna hai

wo aur honge jinhen intiKHab dekhna hai

hamein to bhai faqat intisab dekhna hai

hamara sirf hamara bayan ho jis mein

kitab-e-'ishq mein ek aisa bab dekhna hai

hisab apne gunahon ka kyon rakhen jab ki

hamein tera karam-e-be-hisab dekhna hai

hawas ghurur raqabat fasad bechaini

hamare bachchon ko kya kya 'azab dekhna hai

jo sans lije to farhat jo chhoDiye to sukun

wo daur aaega kab ye janab dekhna hai

nafas nafas mein ho KHushbu mohabbaton ki 'obaid'

tamam 'umr yahi ek KHwab dekhna hai