jo aap aaen to aangan mein raushni hogi

jo aap aa.eñ to āñgan meñ raushnī hogī

ḳhamoshiyoñ meñ mohabbat kī bāñsurī hogī

chaman ne bhej diyā hai payām phūloñ ko

havā bhī aaj darīche meñ kāsnī hogī

kise ḳhabar thī ki nikle jo aaj jannat se

ġhubār-e-zīst meñ is darja nīstī hogī

rukūñgī aur ghaḌī bhar yahīñ pe raste meñ

vo kah gayā thā bahut jald vāpsī hogī

jo ham-kalām kabhī ho to jaan loge use

vo ḳhush-mizāj hai lahje meñ chāshnī hogī

vo merī aañkh meñ utrā hai ḳhvāb kī sūrat

to us kī aañkh mujhe bhī to dekhtī hogī

banā rahe haiñ jise aap dil kā afsāna

mirā ḳhayāl hai 'nīlam' kī dil-lagī hogī

jo aap aaen to aangan mein raushni hogi

KHamoshiyon mein mohabbat ki bansuri hogi

chaman ne bhej diya hai payam phulon ko

hawa bhi aaj dariche mein kasni hogi

kise KHabar thi ki nikle jo aaj jannat se

ghubar-e-zist mein is darja nisti hogi

rukungi aur ghaDi bhar yahin pe raste mein

wo kah gaya tha bahut jald wapsi hogi

jo ham-kalam kabhi ho to jaan loge use

wo KHush-mizaj hai lahje mein chashni hogi

wo meri aankh mein utra hai KHwab ki surat

to us ki aankh mujhe bhi to dekhti hogi

bana rahe hain jise aap dil ka afsana

mera KHayal hai 'nilam' ki dil-lagi hogi