jo ab bhi unki yaaden aaiyan hain

jo ab bhī un kī yādeñ ā.iyāñ haiñ

to āñkheñ ashk-e-ḳhūñ barsā.iyāñ haiñ

purāne zaḳhm kar detī haiñ taaza

sitamgar kis qadar purvā.iyāñ haiñ

ye roz-o-shab ye sub.h-o-shām kyā haiñ

nigār-e-vaqt kī añgḌā.iyāñ haiñ

agar dil hī huā shā.ista-e-ġham

kahāñ duniyā meñ phir ra.anā.iyāñ haiñ

ye kyā qissa nikālā tū ne nāseh

dil-e-betāb par ban ā.iyāñ haiñ

sañbhal jā ai dil-e-nādāñ sañbhal jā

ki aage har taraf rusvā.iyāñ haiñ

nikāle sab ne apne apne matlab

suḳhan meñ kis qadar gahrā.iyāñ haiñ

banā Daalā zamāne bhar ko dushman

balā-e-jāñ mirī dānā.iyāñ haiñ

maqām-e-shukr hai ye bhī to 'az.har'

muqaddar meñ agar tanhā.iyāñ haiñ

jo ab bhi un ki yaaden aaiyan hain

to aankhen ashk-e-KHun barsaiyan hain

purane zaKHm kar deti hain taza

sitamgar kis qadar purwaiyan hain

ye roz-o-shab ye subh-o-sham kya hain

nigar-e-waqt ki angDaiyan hain

agar dil hi hua shaista-e-gham

kahan duniya mein phir ranaiyan hain

ye kya qissa nikala tu ne naseh

dil-e-betab par ban aaiyan hain

sanbhal ja ai dil-e-nadan sanbhal ja

ki aage har taraf ruswaiyan hain

nikale sab ne apne apne matlab

suKHan mein kis qadar gahraiyan hain

bana Dala zamane bhar ko dushman

bala-e-jaan meri danaiyan hain

maqam-e-shukr hai ye bhi to 'azhar'

muqaddar mein agar tanhaiyan hain