jo adu-e-bagh ho barbaad ho

jo adū-e-bāġh ho barbād ho

koī ho gulchīñ ho yā sayyād ho

mujh sā āshiq morid-e-bedād ho

tum baḌe saffāk ho jallād ho

kūcha-e-jānāñ se matlab hai hameñ

dair vīrāñ ho haram barbād ho

qaid-e-maz.hab vāqa.ī ik rog hai

aadmī ko chāhiye āzād ho

daur daur-e-mohtasib hai sāqiyā

haa.e kyūñkar mai-kada ābād ho

bik ga.e haiñ aap to ġhairoñ ke haath

banda-parvar ab ġhulām āzād ho

ye tamīz allāh de sayyād ko

baaġh vīrāñ ho qafas ābād ho

sarv-qaddoñ se agar paalā paḌe

ḳhuub sīdhā baaġh meñ shamshād ho

aa.ina dil kā jo dikhlā.ūñ unheñ

jā-e-hairat ho ajab rūdād ho

tum vo ho mar jaa.eñ to bhī ġham na ho

aish ho ishrat ho ḳhush ho shaad ho

gumbad-e-gardūñ par ai dil aah se

kuchh na kuchh aafat paḌe uftād ho

maut hañstī hai ḳhizar ke haal par

tā-kujā hastī-e-be-buniyād ho

mausam-e-gul ho junūñ kā josh ho

jā-ba-jā haddād ho fassād ho

kaan rakh kar vo mire naale sune

zulf dūd-e-shola-e-fariyād ho

maiñ vo bulbul huuñ jise dono haiñ ek

baaġh ho yā ḳhāna-e-sayyād ho

nazr sar kartā huuñ maiñ ai shāh-e-husn

hukm ho jallād ko irshād ho

rañg laayā hai laḌakpan aap kā

nau-bahār-e-gulshan-e-ījād ho

kyā qayāmat hai burā ho maut kā

ham na hoñ ye ālam-e-ījād ho

bār-e-ilāhā yuuñ uTheñ mahshar ko ham

haath ho aur dāman jallād ho

zāhir-o-bātin meñ ai dil farq ho

but baġhal meñ ho ḳhudā kī yaad ho

un raqīboñ ko ḳhudā ġhārat kare

aap hoñ ye āshiq-e-nāshād ho

aap ko apnī ḳhushī se kaam hai

koī nā-ḳhush ho koī nāshād ho

aah āñdhī hai miTāne ke liye

naqsh-e-hastī chāhiye barbād ho

jaa.e gulshan meñ jo tū ai naunihāl

kyā tavārud misra-e-shamshād ho

ḳhuub hai us gul ko laa.e raah par

ai 'sabā' tum bhī baḌe ustād ho

jo adu-e-bagh ho barbaad ho

koi ho gulchin ho ya sayyaad ho

mujh sa aashiq morid-e-bedad ho

tum baDe saffak ho jallad ho

kucha-e-jaanan se matlab hai hamein

dair viran ho haram barbaad ho

qaid-e-mazhab waqai ek rog hai

aadmi ko chahiye aazad ho

daur daur-e-mohtasib hai saqiya

hae kyunkar mai-kada aabaad ho

bik gae hain aap to ghairon ke hath

banda-parwar ab ghulam aazad ho

ye tamiz allah de sayyaad ko

bagh viran ho qafas aabaad ho

sarw-qaddon se agar pala paDe

KHub sidha bagh mein shamshad ho

aaina dil ka jo dikhlaun unhen

ja-e-hairat ho ajab rudad ho

tum wo ho mar jaen to bhi gham na ho

aish ho ishrat ho KHush ho shad ho

gumbad-e-gardun par ai dil aah se

kuchh na kuchh aafat paDe uftad ho

maut hansti hai KHizar ke haal par

ta-kuja hasti-e-be-buniyaad ho

mausam-e-gul ho junun ka josh ho

ja-ba-ja haddad ho fassad ho

kan rakh kar wo mere nale sune

zulf dud-e-shola-e-fariyaad ho

main wo bulbul hun jise dono hain ek

bagh ho ya KHana-e-sayyaad ho

nazr sar karta hun main ai shah-e-husn

hukm ho jallad ko irshad ho

rang laya hai laDakpan aap ka

nau-bahaar-e-gulshan-e-ijad ho

kya qayamat hai bura ho maut ka

hum na hon ye aalam-e-ijad ho

bar-e-ilaha yun uThen mahshar ko hum

hath ho aur daman jallad ho

zahir-o-baatin mein ai dil farq ho

but baghal mein ho KHuda ki yaad ho

un raqibon ko KHuda ghaarat kare

aap hon ye aashiq-e-nashad ho

aap ko apni KHushi se kaam hai

koi na-KHush ho koi nashad ho

aah aandhi hai miTane ke liye

naqsh-e-hasti chahiye barbaad ho

jae gulshan mein jo tu ai naunihaal

kya tawarud misra-e-shamshad ho

KHub hai us gul ko lae rah par

ai 'saba' tum bhi baDe ustad ho