jo ain wasl mein aaram se nahin waqif

jo ain vasl meñ ārām se nahīñ vāqif

vo matlab-e-dil-e-ḳhud-kām se nahīñ vāqif

hañsā chaman meñ jo dil dekh sūrat-e-sayyād

ye murġh daane se aur daam se nahīñ vāqif

tamām shahr meñ jis ke liye hue bad-nām

vo ab talak bhī mire naam se nahīñ vāqif

har ek ishq ke kab qā.ede se mahram hai

hanūz shaiḳh alif laam se nahīñ vāqif

hazār haif yahāñ chhat se lag ga.iiñ āñkheñ

vahāñ vo shoḳh lab-e-bām se nahīñ vāqif

dilā abas talab-e-bosa hai tujhe us se

vo la.al-e-lab ki lab-e-jām se nahīñ vāqif

sajī hai lek use zar kulāh guzrī kī

faqīr atlas-o-pīlām se nahīñ vāqif

tapish se dil kī ḳhabar hove hai yahāñ ma.alūm

maiñ tarz-e-nāma-o-paiġhām se nahīñ vāqif

na ḳhush visāl meñ ho rakh tū yād-e-hijr 'nasīr'

magar tū gardish-e-ayyām se nahīñ vāqif

jo ain wasl mein aaram se nahin waqif

wo matlab-e-dil-e-KHud-kaam se nahin waqif

hansa chaman mein jo dil dekh surat-e-sayyaad

ye murgh dane se aur dam se nahin waqif

tamam shahr mein jis ke liye hue bad-nam

wo ab talak bhi mere nam se nahin waqif

har ek ishq ke kab qaede se mahram hai

hanuz shaiKH alif lam se nahin waqif

hazar haif yahan chhat se lag gain aankhen

wahan wo shoKH lab-e-baam se nahin waqif

dila abas talab-e-bosa hai tujhe us se

wo lal-e-lab ki lab-e-jam se nahin waqif

saji hai lek use zar kulah guzri ki

faqir atlas-o-pilam se nahin waqif

tapish se dil ki KHabar howe hai yahan malum

main tarz-e-nama-o-paigham se nahin waqif

na KHush visal mein ho rakh tu yaad-e-hijr 'nasir'

magar tu gardish-e-ayyam se nahin waqif