jo apne hath se ruKHsat tumhein kiya hai abhi

jo apne haath se ruḳhsat tumheñ kiyā hai abhī

siyāh raat se saudā koī huā hai abhī

ruko zarā sā mujhe saañs to pakaḌne do

badan se ruuh kā dāman judā huā hai abhī

tire darīche se ḳhushbū payām laa.ī hai

gulābī raat kā āñchal mahak rahā hai abhī

charāġh-e-jān bhī suntā hai terī aahaT ko

paḌā huā thā mire paas jal uThā hai abhī

koī ishāra karo baat koī batlāo

sunāo kaise mirā naam le liyā hai abhī

sunā diyā hai mirā jurm jis ne duniyā ko

vo apne aap kī nazroñ meñ ik ḳhudā hai abhī

shab-e-firāq meñ aañsū sulag rahā hai mirā

tavīl raat meñ jaltā huā diyā hai abhī

abhī luTā nahīñ hai kārvāñ mohabbat kā

mirī nazar meñ tire vāste vafā hai abhī

hurūf chup hī rahe daur muḳhtasar hī rahā

fasāna dil kā tirī aañkh se sunā hai abhī

abhī na jaao mirī aañkh kī hayā rakh lo

mire vujūd meñ kachchā sā ik ghaḌā hai abhī

laboñ pe harf ke ikrām kis tarah utreñ

mire ḳhayāl kā maqtal sajā huā hai abhī

hare libās meñ ham-zād saath rahtā hai

nigāh-e-shauq meñ rakh kar mujhe milā hai abhī

agarche dhuup kaḌī ho ga.ī hai sahrā meñ

vufūr-e-shauq se ġhuncha khilā huā hai abhī

chalā gayā hai magar lauT aa.egā 'nīlam'

vo zūd-ranj sahī dost vo mirā hai abhī

jo apne hath se ruKHsat tumhein kiya hai abhi

siyah raat se sauda koi hua hai abhi

ruko zara sa mujhe sans to pakaDne do

badan se ruh ka daman juda hua hai abhi

tere dariche se KHushbu payam lai hai

gulabi raat ka aanchal mahak raha hai abhi

charagh-e-jaan bhi sunta hai teri aahaT ko

paDa hua tha mere pas jal uTha hai abhi

koi ishaara karo baat koi batlao

sunao kaise mera nam le liya hai abhi

suna diya hai mera jurm jis ne duniya ko

wo apne aap ki nazron mein ek KHuda hai abhi

shab-e-firaq mein aansu sulag raha hai mera

tawil raat mein jalta hua diya hai abhi

abhi luTa nahin hai karwan mohabbat ka

meri nazar mein tere waste wafa hai abhi

huruf chup hi rahe daur muKHtasar hi raha

fasana dil ka teri aankh se suna hai abhi

abhi na jao meri aankh ki haya rakh lo

mere wujud mein kachcha sa ek ghaDa hai abhi

labon pe harf ke ikram kis tarah utren

mere KHayal ka maqtal saja hua hai abhi

hare libas mein ham-zad sath rahta hai

nigah-e-shauq mein rakh kar mujhe mila hai abhi

agarche dhup kaDi ho gai hai sahra mein

wufur-e-shauq se ghuncha khila hua hai abhi

chala gaya hai magar lauT aaega 'nilam'

wo zud-ranj sahi dost wo mera hai abhi