jo ba-kirdar ho usko siyani kaun kahta hai

jo bā-kirdār ho us ko siyānī kaun kahtā hai

kisī mazdūr kī beTī ko raanī kaun kahtā hai

bajaT jab saare lag jaa.eñ vazārat kī hī kursī par

to is tarz-e-ma.īshat ko girānī kaun kahtā hai

mohabbat ke fasāne aaj bhī tahrīr hote haiñ

bahār-e-zindagānī ko purānī kaun kahtā hai

mirī naanī sunātī thī hikāyat saat pariyoñ kī

vo sachche pyaar kī lorī suhānī kaun kahtā hai

nahīñ miTtā miTāne se kisī se pyaar kā rishta

mohabbat to haqīqat hai kahānī kaun kahtā hai

atā umr-e-ravāñ ne kī hai jo sauġhāt bāloñ ko

utartī chāñdnī ko naujavānī kaun kahtā hai

sabhī ne āp-bītī aur jag-bītī kahī lekin

mire andāz se sachchī kahānī kaun kahtā hai

kuchh aise log hote haiñ jo mar ke bhī nahīñ marte

haiñ jin ke naam zinda un ko faanī kaun kahtā hai

jo mere lab nahīñ kahte mire ash.ār kahte haiñ

jo dil tahrīr kartā hai zabānī kaun kahtā hai

'sabīla' apne ġham ko maiñ chhupā letī to huuñ lekin

girātī haiñ jo āñkheñ un ko paanī kaun kahtā hai

jo ba-kirdar ho us ko siyani kaun kahta hai

kisi mazdur ki beTi ko rani kaun kahta hai

bajaT jab sare lag jaen wazarat ki hi kursi par

to is tarz-e-maishat ko girani kaun kahta hai

mohabbat ke fasane aaj bhi tahrir hote hain

bahaar-e-zindagani ko purani kaun kahta hai

meri nani sunati thi hikayat sat pariyon ki

wo sachche pyar ki lori suhani kaun kahta hai

nahin miTta miTane se kisi se pyar ka rishta

mohabbat to haqiqat hai kahani kaun kahta hai

ata umr-e-rawan ne ki hai jo saughat baalon ko

utarti chandni ko naujawani kaun kahta hai

sabhi ne aap-biti aur jag-biti kahi lekin

mere andaz se sachchi kahani kaun kahta hai

kuchh aise log hote hain jo mar ke bhi nahin marte

hain jin ke nam zinda un ko fani kaun kahta hai

jo mere lab nahin kahte mere ashaar kahte hain

jo dil tahrir karta hai zabani kaun kahta hai

'sabila' apne gham ko main chhupa leti to hun lekin

giraati hain jo aankhen un ko pani kaun kahta hai