jo barishon mein jale tund aandhiyon mein jale

jo bārishoñ meñ jale tund āñdhiyoñ meñ jale

charāġh vo jo bagūloñ kī chimniyoñ meñ jale

vo log the jo fareb-e-nazar ke matvāle

tamām umr sarāboñ ke pāniyoñ meñ jale

kuchh is tarah se lagī aag bādbānoñ ko

ki Dūbne ko bhī tarse jo kashtiyoñ meñ jale

yahī hai faisla terā ki jo tujhe chāhe

vo dard-o-karb-o-alam kī kaThāliyoñ meñ jale

dam-e-firāq ye maanā vo muskurāyā thā

magar vo diip ki chupke se añkhḌiyoñ meñ jale

vo jhiil jhiil meñ jhurmuT na the sitāroñ ke

charāġh the ki jo chāñdī kī thāliyoñ meñ jale

dhuāñ dhuāñ hai daraḳhtoñ kī dāstāñ 'anvar'

ki jañgaloñ meñ pale aur bastiyoñ meñ jale

jo barishon mein jale tund aandhiyon mein jale

charagh wo jo bagulon ki chimniyon mein jale

wo log the jo fareb-e-nazar ke matwale

tamam umr sarabon ke paniyon mein jale

kuchh is tarah se lagi aag baadbanon ko

ki Dubne ko bhi tarse jo kashtiyon mein jale

yahi hai faisla tera ki jo tujhe chahe

wo dard-o-karb-o-alam ki kaThaaliyon mein jale

dam-e-firaq ye mana wo muskuraya tha

magar wo dip ki chupke se ankhDiyon mein jale

wo jhil jhil mein jhurmuT na the sitaron ke

charagh the ki jo chandi ki thaaliyon mein jale

dhuan dhuan hai daraKHton ki dastan 'anwar'

ki jangalon mein pale aur bastiyon mein jale