jo bhi apnon se ulajhta hai wo kar kya lega

jo bhī apnoñ se ulajhtā hai vo kar kyā legā

vaqt bikhrī huī tāqat kā asar kyā legā

ḳhaar hī ḳhaar haiñ tā-hadd-e-nazar dīvāne

hai ye dīvāna-e-insāf udhar kyā legā

jaan par khel bhī jaatā hai sazāvār-e-qafas

is bharose meñ na rahiyegā ye kar kyā legā

pastī-e-zauq bulandī-e-nazar dār-o-rasan

un se tū māñgne jaatā hai magar kyā legā

rahbar-e-qaum-o-vatan us ko ḳhudā sharmā.e

ḳhud jo bhaTkā ho vo auroñ kī ḳhabar kyā legā

sham-e-mahfil kā baqiyyā hai faroġh-e-ummīd

shaam se jis kā ye aalam ho sahar kyā legā

bāġhbāñ koshish-e-bejā pe magan hai lekin

bhañg botā hai jo gulshan meñ samar kyā legā

shā.er-e-gauhar-e-be-āb-e-zamāna ai 'shād'

sher-fahmoñ se kabhī dād-e-hunar kyā legā

jo bhi apnon se ulajhta hai wo kar kya lega

waqt bikhri hui taqat ka asar kya lega

KHar hi KHar hain ta-hadd-e-nazar diwane

hai ye diwana-e-insaf udhar kya lega

jaan par khel bhi jata hai sazawar-e-qafas

is bharose mein na rahiyega ye kar kya lega

pasti-e-zauq bulandi-e-nazar dar-o-rasan

un se tu mangne jata hai magar kya lega

rahbar-e-qaum-o-watan us ko KHuda sharmae

KHud jo bhaTka ho wo auron ki KHabar kya lega

sham-e-mahfil ka baqiyya hai farogh-e-ummid

sham se jis ka ye aalam ho sahar kya lega

baghban koshish-e-beja pe magan hai lekin

bhang bota hai jo gulshan mein samar kya lega

shaer-e-gauhar-e-be-ab-e-zamana ai 'shad'

sher-fahmon se kabhi dad-e-hunar kya lega