jo bhi minjumla-e-ashufta sara hota hai

jo bhī minjumla-e-āshufta sarā hotā hai

zīnat-e-mahfil-e-sāhab-nazrāñ hotā hai

yahī dil jis ko shikāyat hai girāñ-jānī kī

yahī dil kār-gah-e-shīsha-girāñ hotā hai

shāḳh-e-gulzār ke saa.e meñ kahāñ dam liije

ki yahāñ ḳhuun kā sail-e-guzarāñ hotā hai

kis ko dikhlā.iye apnoñ kī malāmat kā samāñ

ki ye uslūb hadīs-e-digrāñ hotā hai

kis ko batlā.īye vo rābta-e-nāz-o-niyāz

un kī mahfil meñ jo ai dīda-varāñ hotā hai

kabhī kartī hai tajallī nigarānī dil kī

kabhī dil sū-e-tajallī-nigarāñ hotā hai

mujh pe hote haiñ ġham-e-dil ke sahīfe nāzil

jin meñ afsāna-e-ālī-guharāñ hotā hai

dil bhī detā hai mujhe mashvara-e-tark-e-vafā

kuchh taqāzā-e-jahān-e-guzarāñ hotā hai

maiñ to huuñ shefta-e-rang-e-taġhazzul 'ābid'

ki yahī shāhid-e-ḳhūnīñ-jigrāañ hotā hai

jo bhi minjumla-e-ashufta sara hota hai

zinat-e-mahfil-e-sahab-nazran hota hai

yahi dil jis ko shikayat hai giran-jaani ki

yahi dil kar-gah-e-shisha-giran hota hai

shaKH-e-gulzar ke sae mein kahan dam lije

ki yahan KHun ka sail-e-guzaran hota hai

kis ko dikhlaiye apnon ki malamat ka saman

ki ye uslub hadis-e-digran hota hai

kis ko batlaiye wo rabta-e-naz-o-niyaz

un ki mahfil mein jo ai dida-waran hota hai

kabhi karti hai tajalli nigarani dil ki

kabhi dil su-e-tajalli-nigaran hota hai

mujh pe hote hain gham-e-dil ke sahife nazil

jin mein afsana-e-ali-guharan hota hai

dil bhi deta hai mujhe mashwara-e-tark-e-wafa

kuchh taqaza-e-jahan-e-guzaran hota hai

main to hun shefta-e-rang-e-taghazzul 'abid'

ki yahi shahid-e-KHunin-jigraan hota hai