jo bhi yahan hua wo bahut hi bura hua

jo bhī yahāñ huā vo bahut hī burā huā

har aadmī kā zehn hai ab tak jalā huā

miTTī ko sūñghne se koī fā.eda nahīñ

maiñ jā rahā huuñ naqsh-e-vafā chhoḌtā huā

rauzan banā rahe haiñ ḳhalā meñ kiran ke tiir

sūraj isī liye hai zamīñ par jhukā huā

ham sah rahe haiñ apne azīzoñ ke dard-o-ġham

aayā jo dast-o-pā liye be-dast-o-pā huā

ik shaḳhs mere saath safar meñ rahā magar

manzil qarīb aa.ī to mujh se judā huā

mujh ko kisī kī baat kī parvā nahīñ abhī

maiñ jī rahā huuñ shahr meñ tanhā to kyā huā

afsos kī nahīñ ye ta.ajjub kī baat hai

kaise guzar gayā vo mujhe dekhtā huā

tum ne mire liye to bahut kuchh kiyā magar

kyā tum ko ai 'hasīr' koī fā.eda huā

jo bhi yahan hua wo bahut hi bura hua

har aadmi ka zehn hai ab tak jala hua

miTTi ko sunghne se koi faeda nahin

main ja raha hun naqsh-e-wafa chhoDta hua

rauzan bana rahe hain KHala mein kiran ke tir

suraj isi liye hai zamin par jhuka hua

hum sah rahe hain apne azizon ke dard-o-gham

aaya jo dast-o-pa liye be-dast-o-pa hua

ek shaKHs mere sath safar mein raha magar

manzil qarib aai to mujh se juda hua

mujh ko kisi ki baat ki parwa nahin abhi

main ji raha hun shahr mein tanha to kya hua

afsos ki nahin ye tajjub ki baat hai

kaise guzar gaya wo mujhe dekhta hua

tum ne mere liye to bahut kuchh kiya magar

kya tum ko ai 'hasir' koi faeda hua