جو چشم و دل سے چڑھا دوں نالے بہ آب اول دوم بہ آتش

جو چشم و دل سے چڑھا دوں نالے بہ آب اول دوم بہ آتش

تو ماہ و خور کے بھروں پیالے بہ آب اول دوم بہ آتش

جو چشم رووے تو دل بھی آہوں میں میری لخت جگر پرووے

جپے وہ سمرن تری یہ مالے بہ آب اول دوم بہ آتش

جو کوئی تربت پہ میری گزرے تو تاب اشک و تب فغاں سے

پڑیں دو ہر ہر قدم پہ چھالے بہ آب اول دوم بہ آتش

جو آہ پیچاں سے اشک شب کو فلک پہ گردش کناں چڑھے گا

تو گرد مہ دو پڑیں گے ہالے بہ آب اول دوم بہ آتش

سرشک و آہ اب یہ بے اثر ہیں کہ جا فلک تک شب جدائی

در اثر پر یہ دے ہیں تالے بہ آب اول دوم بہ آتش

مباد فرقت میں چشم و دل کی یہ اشک ریزی اور آہ خیزی

بلائے ناگہ جہاں پہ ڈالے بہ آب اول دوم بہ آتش

فلک سے دیووں کی طرح اس بن سرشک و آہ بقاؔ سے اب تو

چڑھے ہیں لڑنے کو دو رسالے بہ آب اول دوم بہ آتش