jo dam huqqe ka dun bole ki main huqqa nahin pita

jo dam huqqe kā duuñ bole ki ''maiñ huqqā nahīñ pītā''

bharūñ jaldī se gar sulfā, kahe ''sulfā nahīñ pītā''

ḳhudā ke vāste kar tū hī saaqī us kī dildārī

ki mere haath se mai, yār-e-be-parvā nahīñ piitā

agarche mai-kada ma.amūr hai lekin tirā kaifī

ba-rañg-e-gul ba-juz yak-sāġhar-e-sahbā nahīñ piitā

maiñ ālī-himmatī kā us kī banda huuñ ki jo mai-kash

nahīñ maltī jo mai, to bhañg aur buuzā nahīñ piitā

vazīr-ul-mulk kā az-bas-ki mai-e-naushāñ pe qadġhan hai

bajā.e mai, hai vo yaañ kaun jo katthā nahīñ piitā

lab-e-sofār meñ surḳhī kahāñ se us ke aa.ī hai?

jo terā tiir piyāre ḳhūn-e-dil merā nahīñ piitā

kasī ne ye fusūñ kuchh paḌh ke us kāfir pe maarā hai

ki in rozoñ vo paanī bhī mire ghar kā nahīñ piitā

piye hai is tarah dīvāna, mal mal taak ke patte

ki tiryākī bhī yuuñ afyūn kā gholā nahīñ piitā

kahe hai mujh se yuuñ hamdam ki rut lāhan kī aa.ī hai

vale kyā fā.eda tujh ko, tū Dar Tharrā nahīñ piitā

chale hai roz ġhairoñ ke gale par teġh-e-tez us kī

lahū ke ghoñT kis din āshiq-e-shaidā nahīñ piitā

sharāb-e-dostgānī kā qadah rakh haath par apne

kahā maiñ ne jo ''pī'' us ko, vo yuuñ bolā ''nahīñ pītā''

nahīñ miltā vo jo shīrīñ-dahan ai 'mus.hafī' tujh ko

tū us ke hijr meñ kyuuñ zahr kā pyālā nahīñ piitā

jo dam huqqe ka dun bole ki main huqqa nahin pita

bharun jaldi se gar sulfa, kahe sulfa nahin pita

KHuda ke waste kar tu hi saqi us ki dildari

ki mere hath se mai, yar-e-be-parwa nahin pita

agarche mai-kada mamur hai lekin tera kaifi

ba-rang-e-gul ba-juz yak-saghar-e-sahba nahin pita

main aali-himmati ka us ki banda hun ki jo mai-kash

nahin malti jo mai, to bhang aur buza nahin pita

wazir-ul-mulk ka az-bas-ki mai-e-naushan pe qadghan hai

bajae mai, hai wo yan kaun jo kattha nahin pita

lab-e-sofar mein surKHi kahan se us ke aai hai?

jo tera tir piyare KHun-e-dil mera nahin pita

kasi ne ye fusun kuchh paDh ke us kafir pe mara hai

ki in rozon wo pani bhi mere ghar ka nahin pita

piye hai is tarah diwana, mal mal tak ke patte

ki tiryaki bhi yun afyun ka ghola nahin pita

kahe hai mujh se yun hamdam ki rut lahan ki aai hai

wale kya faeda tujh ko, tu Dar Tharra nahin pita

chale hai roz ghairon ke gale par tegh-e-tez us ki

lahu ke ghonT kis din aashiq-e-shaida nahin pita

sharab-e-dostgani ka qadah rakh hath par apne

kaha main ne jo pi us ko, wo yun bola nahin pita

nahin milta wo jo shirin-dahan ai 'mushafi' tujh ko

tu us ke hijr mein kyun zahr ka pyala nahin pita