jo dar khula hai shikasta makan ka hissa hai

jo dar khulā hai shikasta makāñ kā hissa hai

mirā yaqīn fareb-e-gumāñ kā hissa hai

kahāñ se aa.ī haram meñ ye ḳhāk-e-rāh-guzar

vahīñ pe Daal do us ko jahāñ kā hissa hai

kisī shikasta jagah Thiik baiThtā hī nahīñ

dil-e-hazīñ kā ye TukḌā kahāñ kā hissa hai

safar nasīb huuñ sāhil se kyā ġharaz mujh ko

mirā safīna to āb-e-ravāñ kā hissa hai

ajab usuul bane haiñ yahāñ tijārat ke

kisī kā suud kisī ke ziyāñ kā hissa hai

fazā-e-ālam-e-insāniyat kā afsāna

kahīñ zamīn kahīñ āsmāñ kā hissa hai

use zamāne kī gardish miTā nahīñ saktī

ye zindagī nafas-e-jāvedāñ kā hissa hai

'valī' se le ke jo phailī hai 'mīr'-o-'ġhālib' tak

hamārā qissa usī dāstāñ kā hissa hai

falak misāl hai 'māhir' hamārī bastī bhī

hamārā ghar bhī kisī kahkashāñ kā hissa hai

jo dar khula hai shikasta makan ka hissa hai

mera yaqin fareb-e-guman ka hissa hai

kahan se aai haram mein ye KHak-e-rah-guzar

wahin pe Dal do us ko jahan ka hissa hai

kisi shikasta jagah Thik baiThta hi nahin

dil-e-hazin ka ye TukDa kahan ka hissa hai

safar nasib hun sahil se kya gharaz mujh ko

mera safina to aab-e-rawan ka hissa hai

ajab usul bane hain yahan tijarat ke

kisi ka sud kisi ke ziyan ka hissa hai

faza-e-alam-e-insaniyat ka afsana

kahin zamin kahin aasman ka hissa hai

use zamane ki gardish miTa nahin sakti

ye zindagi nafas-e-jawedan ka hissa hai

'wali' se le ke jo phaili hai 'mir'-o-'ghaalib' tak

hamara qissa usi dastan ka hissa hai

falak misal hai 'mahir' hamari basti bhi

hamara ghar bhi kisi kahkashan ka hissa hai