jo dil mein KHun-e-tamanna kiya na karte hum

jo dil meñ ḳhūn-e-tamannā kiyā na karte ham

to misl-e-shola bhaḌak kar jalā na karte ham

agar na kashmakash-e-vahshat-e-junūñ hotī

to chaak jaib-o-garebāñ kiyā na karte ham

agar na ḳhātir-e-sayyād par garāñ hote

to yuuñ taḌap ke qafas se uḌā na karte ham

umiid naqsh pe aane kī tere gar hotī

to apne jiine kī hargiz duā na karte ham

na hote tere taġhāful ke ham agar kushte

to zer-e-teġh kabhī dam liyā na karte ham

jo dāġh-e-sīna-e-āshiq na mash.alī hotā

to āftāb se nisbat diyā na karte ham

jo dil mein KHun-e-tamanna kiya na karte hum

to misl-e-shola bhaDak kar jala na karte hum

agar na kashmakash-e-wahshat-e-junun hoti

to chaak jaib-o-gareban kiya na karte hum

agar na KHatir-e-sayyaad par garan hote

to yun taDap ke qafas se uDa na karte hum

umid naqsh pe aane ki tere gar hoti

to apne jine ki hargiz dua na karte hum

na hote tere taghaful ke hum agar kushte

to zer-e-tegh kabhi dam liya na karte hum

jo dagh-e-sina-e-ashiq na mashali hota

to aaftab se nisbat diya na karte hum