jo dil mera nahin mujhe us dil se kya gharaz

jo dil mirā nahīñ mujhe us dil se kyā ġharaz

chalnī na ho jo raah to manzil se kyā ġharaz

Dūbūñgā gar hai mere muqaddar meñ Dūbnā

ġhavvās-e-bahr-e-ishq ko sāhil se kyā ġharaz

vo dil ko dekhtā hai na a.amāl-e-zāhirī

lailā ke ḳhvāst-gār ko mahmil se kyā ġharaz

suntā hai kaun āshiqoñ kī āh-o-zāriyāñ

gosh-e-chaman ko shor-e-anādil se kyā ġharaz

ham us ke shefta haiñ raqīboñ se vāsta

gul se ġharaz hai fauj-e-anādil se kyā ġharaz

martā huuñ aur jā nahīñ saktā sū-e-adam

mujh nā-tavāñ ko tauq-o-salāsil se kyā ġharaz

kyuuñ dar-pai-e-talāsh haiñ ahbāb-o-aqrabā

'parvīñ' shahīd-e-nāz ko qātil se kyā ġharaz

jo dil mera nahin mujhe us dil se kya gharaz

chalni na ho jo rah to manzil se kya gharaz

Dubunga gar hai mere muqaddar mein Dubna

ghawwas-e-bahr-e-ishq ko sahil se kya gharaz

wo dil ko dekhta hai na aamal-e-zahiri

laila ke KHwast-gar ko mahmil se kya gharaz

sunta hai kaun aashiqon ki aah-o-zariyan

gosh-e-chaman ko shor-e-anadil se kya gharaz

hum us ke shefta hain raqibon se wasta

gul se gharaz hai fauj-e-anadil se kya gharaz

marta hun aur ja nahin sakta su-e-adam

mujh na-tawan ko tauq-o-salasil se kya gharaz

kyun dar-pai-e-talash hain ahbab-o-aqraba

'parwin' shahid-e-naz ko qatil se kya gharaz