jo dil nahin rakhta koi mushkil nahin rakhta

jo dil nahīñ rakhtā koī mushkil nahīñ rakhtā

mushkil nahīñ rakhtā koī jo dil nahīñ rakhtā

khīñche liye jaatā hai kahīñ shauq-e-shahādat

dam lene kī taab ab dil-e-bismil nahīñ rakhtā

hoñ reg ke mānind shab-o-roz safar meñ

āvāra-e-vahshat koī manzil nahīñ rakhtā

majbūr huuñ kyā zor chale josh-e-junūñ se

zanjīr koī paañv ke qābil nahīñ rakhtā

ka.abe se ho yā der se manzil pe pahuñch jā.ūñ

ik dhun hai tamīz-e-haq-o-bātil nahīñ rakhtā

mai-ḳhāne ko dekhe koī in āñkhoñ se ġhāfil

ik nuur kā dariyā hai ki sāhil nahīñ rakhtā

kausar bhī khiñch aa.e to ye niyyat nahīñ bhartī

dariyā-e-havas vo hai ki sāhil nahīñ rakhtā

aayā na koī ḳhvāb meñ bhī mulk-e-adam se

afsos ki itnī bhī kashish-e-dil nahīñ rakhtā

lailā ko bhalā dekhegā kin āñkhoñ se majnūñ

jab tāqat-e-nazzāra-e-mahamil nahīñ rakhtā

kyuuñ 'yās' qafas meñ bhī vahī zamzama-sanjī

aisā to zamāne meñ koī dil nahīñ rakhtā

jo dil nahin rakhta koi mushkil nahin rakhta

mushkil nahin rakhta koi jo dil nahin rakhta

khinche liye jata hai kahin shauq-e-shahadat

dam lene ki tab ab dil-e-bismil nahin rakhta

hon reg ke manind shab-o-roz safar mein

aawara-e-wahshat koi manzil nahin rakhta

majbur hun kya zor chale josh-e-junun se

zanjir koi panw ke qabil nahin rakhta

kabe se ho ya der se manzil pe pahunch jaun

ek dhun hai tamiz-e-haq-o-baatil nahin rakhta

mai-KHane ko dekhe koi in aankhon se ghafil

ek nur ka dariya hai ki sahil nahin rakhta

kausar bhi khinch aae to ye niyyat nahin bharti

dariya-e-hawas wo hai ki sahil nahin rakhta

aaya na koi KHwab mein bhi mulk-e-adam se

afsos ki itni bhi kashish-e-dil nahin rakhta

laila ko bhala dekhega kin aankhon se majnun

jab taqat-e-nazzara-e-mahamil nahin rakhta

kyun 'yas' qafas mein bhi wahi zamzama-sanji

aisa to zamane mein koi dil nahin rakhta