jo dil ne kah di hai wo baat an-kahi bhi na thi

jo dil ne kah dī hai vo baat an-kahī bhī na thī

ye mauj to tah-e-dariyā kabhī rahī bhī na thī

jhukeñ jo sochtī palkeñ to merī duniyā ko

Dubo ga.ī vo nadī jo abhī bahī bhī na thī

sarak gayā koī saayā simaT gayā koī duur

kisī ke aks kī pyāsī kashish sahī bhī na thī

sunī jo baat koī an-sunī to yaad aayā

vo dil ki jis kī kahānī kabhī kahī bhī na thī

nagar nagar vahī āñkheñ pas-e-zamāñ pas-e-dar

mirī ḳhatā kī sazā umr-e-gumrahī bhī na thī

kisī kī ruuh tak ik fāsla ḳhayāl kā thā

kabhī kabhī to ye duurī rahī-sahī bhī na thī

nashe kī rau meñ ye jhalkā hai kyuuñ nashe kā shu.ūr

is aag meñ to koī āb-e-āgahī bhī na thī

ġhamoñ kī raakh se 'amjad' vo ġham tulūa hue

jinheñ nasīb ik āh-e-sahr-e-gahī bhī na thī

jo dil ne kah di hai wo baat an-kahi bhi na thi

ye mauj to tah-e-dariya kabhi rahi bhi na thi

jhuken jo sochti palken to meri duniya ko

Dubo gai wo nadi jo abhi bahi bhi na thi

sarak gaya koi saya simaT gaya koi dur

kisi ke aks ki pyasi kashish sahi bhi na thi

suni jo baat koi an-suni to yaad aaya

wo dil ki jis ki kahani kabhi kahi bhi na thi

nagar nagar wahi aankhen pas-e-zaman pas-e-dar

meri KHata ki saza umr-e-gumrahi bhi na thi

kisi ki ruh tak ek fasla KHayal ka tha

kabhi kabhi to ye duri rahi-sahi bhi na thi

nashe ki rau mein ye jhalka hai kyun nashe ka shuur

is aag mein to koi aab-e-agahi bhi na thi

ghamon ki rakh se 'amjad' wo gham tulua hue

jinhen nasib ek aah-e-sahr-e-gahi bhi na thi