jo dukh diye the kabhi tumko aazmane ko

jo dukh diye the kabhī tum ko āzmāne ko

vo tiir ban ke palaT aa.e sab nishāne ko

tumhārā saath na hotā to be-amāñ hote

tumhārī chhāñv zarūrī thī āshiyāne ko

nahīñ hai ḳhauf ki nīchā dikhā.egī duniyā

jo saath tum raho jānāñ mujhe uThāne ko

jo maiñ ne apnī hī gudḌī meñ ḳhud ujāle haiñ

vahī haiñ la.al bahut zindagī sajāne ko

zarūrī hai ki rahe tāzgī mohabbat meñ

rifāqateñ na rahīñ va.ada ab nibhāne ko

jo tinke tinke jam.a kar ke āshiyāna bane

bas ek barq hai kaafī use jalāne ko

maqām-e-azmat-e-ādam samajh meñ aane lagā

farishte chūmne aate haiñ āstāne ko

hamāre baa'd bhī mahkā karegī bazm-e-tarab

agarche umr lagegī hameñ bhulāne ko

rahegī zinda mire baa'd dāstāñ merī

paḌheñge log hamesha mire fasāne ko

'karāmat' un ko zamāna salām kartā hai

jo nok-e-pā pe hī rakhte haiñ is zamāne ko

jo dukh diye the kabhi tum ko aazmane ko

wo tir ban ke palaT aae sab nishane ko

tumhaara sath na hota to be-aman hote

tumhaari chhanw zaruri thi aashiyane ko

nahin hai KHauf ki nicha dikhaegi duniya

jo sath tum raho jaanan mujhe uThane ko

jo main ne apni hi gudDi mein KHud ujale hain

wahi hain lal bahut zindagi sajaane ko

zaruri hai ki rahe tazgi mohabbat mein

rifaqaten na rahin wada ab nibhane ko

jo tinke tinke jama kar ke aashiyana bane

bas ek barq hai kafi use jalane ko

maqam-e-azmat-e-adam samajh mein aane laga

farishte chumne aate hain aastane ko

hamare ba'd bhi mahka karegi bazm-e-tarab

agarche umr lagegi hamein bhulane ko

rahegi zinda mere ba'd dastan meri

paDhenge log hamesha mere fasane ko

'karamat' un ko zamana salam karta hai

jo nok-e-pa pe hi rakhte hain is zamane ko