jo faqat rahte hon din ko be-qarar

jo faqat rahte hoñ din ko be-qarār

mahvashoñ meñ kījiye un kā shumār

jis pe sahvan ho gayā merā nuzūl

zaat us kī ho ga.ī bas āb-dār

vo mirī sāñsoñ ke raste ho liyā

jo uThā dil se kabhī gard-o-ġhubār

ḳhāliq-e-kaunain se kyā vāsta

jab mirā kirdār Thahrā kirdgār

din ko huuñ maiñ garm shab ko sard huuñ

merī hastī kyā nahīñ hai reg-zār

kashmakash jaarī hai jo aflāk meñ

dekhiye hāsil ho kis ko eqtidār

aur bhī to haiñ yahāñ kitne muqīm

paañv dhartī par na tū itne pasār

maut se kah do na is meñ daḳhl de

ziist se hai rabt merā ustuvār

maut kā pahle hī partav dekh luuñ

dil ke darpan par hai us kā inhisār

ek sūkhā khet hai vo jis jagah

maiñ vahāñ huuñ āb-jū kā rahguzār

ye jo aalam hai kabhī ik des thā

is se kaT kar ban ga.e kitne dayār

ḳhaak huuñ yā mom huuñ kyā imtiyāz

sham-e-mahfil huuñ ki huuñ sham-e-mazār

habs ke zindān meñ rakkhā hai kyoñ

maiñ to zindānī nahīñ huuñ ai 'figār'

jo faqat rahte hon din ko be-qarar

mahwashon mein kijiye un ka shumar

jis pe sahwan ho gaya mera nuzul

zat us ki ho gai bas aab-dar

wo meri sanson ke raste ho liya

jo uTha dil se kabhi gard-o-ghubar

KHaliq-e-kaunain se kya wasta

jab mera kirdar Thahra kirdgar

din ko hun main garm shab ko sard hun

meri hasti kya nahin hai reg-zar

kashmakash jari hai jo aflak mein

dekhiye hasil ho kis ko eqtidar

aur bhi to hain yahan kitne muqim

panw dharti par na tu itne pasar

maut se kah do na is mein daKHl de

zist se hai rabt mera ustuwar

maut ka pahle hi partaw dekh lun

dil ke darpan par hai us ka inhisar

ek sukha khet hai wo jis jagah

main wahan hun aab-ju ka rahguzar

ye jo aalam hai kabhi ek des tha

is se kaT kar ban gae kitne dayar

KHak hun ya mom hun kya imtiyaz

sham-e-mahfil hun ki hun sham-e-mazar

habs ke zindan mein rakkha hai kyon

main to zindani nahin hun ai 'figar'