jo hain mazlum un ko to taDapta chhoD dete hain

jo haiñ mazlūm un ko to taḌaptā chhoḌ dete haiñ

ye kaisā shahr hai zālim ko zinda chhoḌ dete haiñ

anā ke sikke hote haiñ faqīroñ kī bhī jholī meñ

jahāñ zillat mile us dar pe jaanā chhoḌ dete haiñ

huā kaisā asar ma.asūm zehnoñ par ki bachchoñ ko

agar paise dikhāo to khilaunā chhoḌ dete haiñ

agar ma.alūm ho jaa.e paḌosī apnā bhūkā hai

to ġhairat-mand hāthoñ se nivāla chhoḌ dete haiñ

mohazzab log bhī samjhe nahīñ qānūn jangal kā

shikārī sher bhī kavvoñ kā hissa chhoḌ dete haiñ

parindoñ ko bhī insāñ kī tarah hai fikr rozī kī

sahar hote hī apnā āshiyāna chhoḌ dete haiñ

ta'ajjub kuchh nahīñ 'dānā' jo bāzār-e-siyāsat meñ

qalam bik jaa.eñ to sach baat likhnā chhoḌ dete haiñ

jo hain mazlum un ko to taDapta chhoD dete hain

ye kaisa shahr hai zalim ko zinda chhoD dete hain

ana ke sikke hote hain faqiron ki bhi jholi mein

jahan zillat mile us dar pe jaana chhoD dete hain

hua kaisa asar masum zehnon par ki bachchon ko

agar paise dikhao to khilauna chhoD dete hain

agar malum ho jae paDosi apna bhuka hai

to ghairat-mand hathon se niwala chhoD dete hain

mohazzab log bhi samjhe nahin qanun jangal ka

shikari sher bhi kawwon ka hissa chhoD dete hain

parindon ko bhi insan ki tarah hai fikr rozi ki

sahar hote hi apna aashiyana chhoD dete hain

ta'ajjub kuchh nahin 'dana' jo bazar-e-siyasat mein

qalam bik jaen to sach baat likhna chhoD dete hain