jo hum aae to botal kyun alag pir-e-mughan rakh di

jo ham aa.e to botal kyuuñ alag pīr-e-muġhāñ rakh dī

purānī dostī bhī taaq par ai mehrbāñ rakh dī

qafas meñ shāḳh-e-gul sayyād ne ai āsmāñ rakh dī

banā kar shāḳh-e-gul haañ terī shāḳh-e-kahkashāñ rakh dī

ye kaisī aag bhar kar jaam meñ pīr-e-muġhāñ rakh dī

jo toḌī mehr-e-sāġhar se to kuchh uTThā dhuāñ rakh dī

zarā chheḌā jo us ne ho ga.ī aisī za-ḳhud-rafta

ki sham'-e-bazm ne gul-gīr ke lab par zabāñ rakh dī

ḳhudā ke haath hai biknā na biknā mai kā ai saaqī

barābar masjid-e-jāme ke ham ne ab dukāñ rakh dī

chaman kā lutf aatā hai mujhe sayyād ke sadqe

qafas meñ lā ke us ne aaj shāḳh-e-āshiyāñ rakh dī

binā hai ek hī donoñ kī kā'ba ho ki but-ḳhāna

uThā kar ḳhisht-e-ḳhum maiñ ne vahāñ rakh dī yahāñ rakh dī

ye qais-o-kohkan ke se fasāne ban ga.e kitne

kisī ne TukḌe TukḌe sab hamārī dāstāñ rakh dī

ta'ayyun se munazzah shoḳhiyāñ haiñ us ke jalve kī

hamārī vus.at-e-dil meñ banā-e-lā-makāñ rakh dī

nazar muddat se thī ai shaiḳh jis par mai-faroshoñ kī

vo dastār-e-fazīlat rehn ham ne mehrbāñ rakh dī

ye kyā thā jalva un kā dekhnā thā ham ko parde meñ

lagā kar aañkh se ham ne jo tasvīr-e-butāñ rakh dī

ye 'ālam hai 'riyāz' ek ek qatre ko tarastā huuñ

haram meñ ab bharī botal ḳhudā jaane kahāñ rakh dī

jo hum aae to botal kyun alag pir-e-mughan rakh di

purani dosti bhi taq par ai mehrban rakh di

qafas mein shaKH-e-gul sayyaad ne ai aasman rakh di

bana kar shaKH-e-gul han teri shaKH-e-kahkashan rakh di

ye kaisi aag bhar kar jam mein pir-e-mughan rakh di

jo toDi mehr-e-saghar se to kuchh uTTha dhuan rakh di

zara chheDa jo us ne ho gai aisi za-KHud-rafta

ki sham'-e-bazm ne gul-gir ke lab par zaban rakh di

KHuda ke hath hai bikna na bikna mai ka ai saqi

barabar masjid-e-jame ke hum ne ab dukan rakh di

chaman ka lutf aata hai mujhe sayyaad ke sadqe

qafas mein la ke us ne aaj shaKH-e-ashiyan rakh di

bina hai ek hi donon ki ka'ba ho ki but-KHana

uTha kar KHisht-e-KHum main ne wahan rakh di yahan rakh di

ye qais-o-kohkan ke se fasane ban gae kitne

kisi ne TukDe TukDe sab hamari dastan rakh di

ta'ayyun se munazzah shoKHiyan hain us ke jalwe ki

hamari wusat-e-dil mein bana-e-la-makan rakh di

nazar muddat se thi ai shaiKH jis par mai-faroshon ki

wo dastar-e-fazilat rehn hum ne mehrban rakh di

ye kya tha jalwa un ka dekhna tha hum ko parde mein

laga kar aankh se hum ne jo taswir-e-butan rakh di

ye 'alam hai 'riyaz' ek ek qatre ko tarasta hun

haram mein ab bhari botal KHuda jaane kahan rakh di