jo hamare safar ka qissa hai

jo hamāre safar kā qissa hai

vo tirī rahguzar kā qissa hai

sub.h tak ḳhatm ho hī jā.egā

zindagī raat bhar kā qissa hai

dil kī bāteñ zabāñ pe kyuuñ laao

ghar meñ rahne do ghar kā qissa hai

koī talvār kyā batā.egī

dosh kā aur sar kā qissa hai

hosh aa jaa.e to sunā.ūñgā

chashm-e-dīvāna-gar kā qissa hai

chalte rahnā to koī baat na thī

sirf samt-e-safar kā qissa hai

jīte-jī ḳhatm ho nahīñ saktā

zindagī umr bhar kā qissa hai

shaam ko ham sunā.eñge tum ko

shab-e-ġham kī sahar kā qissa hai

tere naqsh-e-qadam kī baat nahīñ

sirf shams o qamar kā qissa hai

dāman-e-ḳhushk laao phir sunñā

ye mirī chashm-e-tar kā qissa hai

chand tinke na the nasheman ke

bāġh-o-shāḳh-o-shajar kā qissa hai

halq meñ chubh rahe haiñ kāñTe se

lab pe gul-hā-e-tar kā qissa hai

merī barbādiyoñ kā haal na pūchh

ek nīchī nazar kā qissa hai

usī bedād-gar se kah de 'sabā'

usī bedād-gar kā qissa hai

jo hamare safar ka qissa hai

wo teri rahguzar ka qissa hai

subh tak KHatm ho hi jaega

zindagi raat bhar ka qissa hai

dil ki baaten zaban pe kyun lao

ghar mein rahne do ghar ka qissa hai

koi talwar kya bataegi

dosh ka aur sar ka qissa hai

hosh aa jae to sunaunga

chashm-e-diwana-gar ka qissa hai

chalte rahna to koi baat na thi

sirf samt-e-safar ka qissa hai

jite-ji KHatm ho nahin sakta

zindagi umr bhar ka qissa hai

sham ko hum sunaenge tum ko

shab-e-gham ki sahar ka qissa hai

tere naqsh-e-qadam ki baat nahin

sirf shams o qamar ka qissa hai

daman-e-KHushk lao phir sunna

ye meri chashm-e-tar ka qissa hai

chand tinke na the nasheman ke

bagh-o-shaKH-o-shajar ka qissa hai

halq mein chubh rahe hain kanTe se

lab pe gul-ha-e-tar ka qissa hai

meri barbaadiyon ka haal na puchh

ek nichi nazar ka qissa hai

usi bedad-gar se kah de 'saba'

usi bedad-gar ka qissa hai