jo ho sake to mere dil ab ek wo qissa bhi

jo ho sake to mire dil ab ik vo qissa bhī

zarā sunā ki hai kuchh zikr jis meñ terā bhī

kabhī safar hī safar meñ jo umr-e-rafta kī samt

palaT ke dekhā to uḌtī thī gard-e-fardā bhī

baḌe salīqe se duniyā ne mere dil ko diye

vo ghaao jin meñ thā sachchā.iyoñ kā charkā bhī

kisī kī ruuh se thā rabt aur apne hisse meñ thī

vo be-kalī jo hai mauj-e-zamāñ kā hissa bhī

ye āñkheñ hañstī vafā.eñ ye palkeñ jhukte ḳhulūs

kuchh is se baḌh ke kisī ne kisī ko samjhā bhī

ye rasm hāsil-e-duniyā hai ik ye rasm-e-sulūk

hazār is meñ sahī nafratoñ kā iimā bhī

diloñ kī aañch se thā barf kī siloñ pe kabhī

siyāh sāñsoñ meñ luthḌā huā pasīna bhī

mujhe Dhakī-chhupī in būjhī uljhanoñ se milā

jachī-tulī huī ik saañs kā bharosā bhī

kabhī kabhī inhī alhaḌ havāoñ meñ 'amjad'

sunā hai duur ke ik des kā sandesā bhī

jo ho sake to mere dil ab ek wo qissa bhi

zara suna ki hai kuchh zikr jis mein tera bhi

kabhi safar hi safar mein jo umr-e-rafta ki samt

palaT ke dekha to uDti thi gard-e-farda bhi

baDe saliqe se duniya ne mere dil ko diye

wo ghao jin mein tha sachchaiyon ka charka bhi

kisi ki ruh se tha rabt aur apne hisse mein thi

wo be-kali jo hai mauj-e-zaman ka hissa bhi

ye aankhen hansti wafaen ye palken jhukte KHulus

kuchh is se baDh ke kisi ne kisi ko samjha bhi

ye rasm hasil-e-duniya hai ek ye rasm-e-suluk

hazar is mein sahi nafraton ka ima bhi

dilon ki aanch se tha barf ki silon pe kabhi

siyah sanson mein luthDa hua pasina bhi

mujhe Dhaki-chhupi in bujhi uljhanon se mila

jachi-tuli hui ek sans ka bharosa bhi

kabhi kabhi inhi alhaD hawaon mein 'amjad'

suna hai dur ke ek des ka sandesa bhi