jo hota aah teri aah-e-be-asar mein asar

jo hotā aah tirī āh-e-be-asar meñ asar

to kuchh to hotā dil-e-shoḳh-e-fitnagar meñ asar

bas ik nigāh meñ māshūq chhīn leñ haiñ dil

ḳhudā ne un kī diyā hai ajab nazar meñ asar

na chhoḌī ġham ne mire ik jigar meñ ḳhuun kī buuñd

kahāñ se ashk kā ho kahiye chashm-e-tar meñ asar

ho us ke saath ye be-iltifāti-e-gul kyuuñ

jo andalīb ke ho nāla-e-sahar meñ asar

kisī kā qaul hai sach sañg ko kare hai mom

rakkhā hai ḳhaas ḳhudā ne ye sīm-o-zar meñ asar

jo aah ne falak-e-pīr ko hilā Daalā

to aap hī kahiye ki haigā ye kis asar meñ asar

jo dekh le to jahannam kī phere bañdh jaa.e

hai merī aah ke vo ek ik sharar meñ asar

bigāḌeñ charḳh se ham 'aish' kis bharose par

na aah meñ hai na soz-e-dil-o-jigar meñ asar

jo hota aah teri aah-e-be-asar mein asar

to kuchh to hota dil-e-shoKH-e-fitnagar mein asar

bas ek nigah mein mashuq chhin len hain dil

KHuda ne un ki diya hai ajab nazar mein asar

na chhoDi gham ne mere ek jigar mein KHun ki bund

kahan se ashk ka ho kahiye chashm-e-tar mein asar

ho us ke sath ye be-iltifati-e-gul kyun

jo andalib ke ho nala-e-sahar mein asar

kisi ka qaul hai sach sang ko kare hai mom

rakkha hai KHas KHuda ne ye sim-o-zar mein asar

jo aah ne falak-e-pir ko hila Dala

to aap hi kahiye ki haiga ye kis asar mein asar

jo dekh le to jahannam ki phere bandh jae

hai meri aah ke wo ek ek sharar mein asar

bigaDen charKH se hum 'aish' kis bharose par

na aah mein hai na soz-e-dil-o-jigar mein asar