جو ہوا قد کشیدہ کا مریض

جو ہوا قد کشیدہ کا مریض

وہ ہوا سوئے لحد لمبا مریض

بال سے باریک جسم زار ہے

لٹ گیا ہے زلف کا ایسا مریض

وہ ہے بیمارئ الفت لا علاج

جس کا عیسیٰ سے نہ ہو اچھا مریض

شربت‌ عناب لب ممکن نہیں

بے دوا دارو ہوں میں مرتا مریض

وہ لگا اک پل میں آنکھیں مانگنے

جس کو اس کی چشم کا دیکھا مریض

گاہ کھولیں گاہ آنکھیں بند کیں

غش ہوا گہہ ہوش میں آیا مریض

ہو جو ممکن بوسۂ سبب ذقن

بہر طاقت اور کھائے کیا مریض

کوہ کن کا نام لے کر وہ پئے

آب شیریں کا ہو جو پیاسا مریض

سرخ ڈورا اس کی آنکھوں میں نہیں

پہنے ہیں ناڑے کا یہ گنڈا مریض

اس چمن کی یہ ہوا ناساز ہے

نرگس شہلا کو بھی پایا مریض

وہ مسیحا بام پر ہے جلوہ گر

اور اوپر کا ہے دم بھرتا مریض

شادؔ رو غربت پہ اس بیمار کی

کربلا سے شام جو پہنچا مریض