jo husn-o-ishq se amn-o-aman mein rahte hain

jo husn-o-ishq se amn-o-amāñ meñ rahte haiñ

kahāñ ke log haiñ vo kis jahāñ meñ rahte haiñ

kalām-e-pāk meñ hai zikr-e-hazrat-e-yūsuf

ye husn-o-ishq har ik dāstāñ meñ rahte haiñ

ilāhī ab se hasīnoñ ko mehrbān banā

ki tere bande unhīñ kī amaañ meñ rahte haiñ

tumhīñ to ho vo jo dard-o-alam meñ rakhte ho

hamīñ to haiñ vo jo āh-o-fuġhāñ meñ rahte haiñ

mujhe to aap se matlab hai chāñd sūraj kaun

vo un ko chāheñge jo āsmāñ meñ rahte haiñ

kidhar kidhar ke chale aate haiñ ye be-vahdat

kahāñ kahāñ ke tumhāre makāñ meñ rahte haiñ

umiid rañj alam zabt dard sabr qalaq

ye sab hamāre dil-e-nā-tavāñ meñ rahte haiñ

hazāroñ kaam haiñ aise bhī dekh ai ġhāfil

ki ba.ad marg bhī log is jahāñ meñ rahte haiñ

ḳhudā samajh le lagāne bujhāne vāloñ ko

ye ḳhvāh-maḳhvāh yahāñ meñ vahāñ meñ rahte haiñ

ishāre aap kī abrū ke koī kyā jaane

ki kitne zahr ke tiir is kamāñ meñ rahte haiñ

hamārī ḳhaas taraqqī hai ḳhāna-vīrānī

kabhī makāñ meñ the ab lā-makāñ meñ rahte haiñ

agar samajh hai to dil de ke lutf-e-zīst uThā

hazār fā.ede us ik ziyāñ meñ rahte haiñ

ḳhayāl-e-dost meñ rahte haiñ ai safī' jab tak

to is jahāñ meñ na ham us jahāñ meñ rahte haiñ

jo husn-o-ishq se amn-o-aman mein rahte hain

kahan ke log hain wo kis jahan mein rahte hain

kalam-e-pak mein hai zikr-e-hazrat-e-yusuf

ye husn-o-ishq har ek dastan mein rahte hain

ilahi ab se hasinon ko mehrban bana

ki tere bande unhin ki aman mein rahte hain

tumhin to ho wo jo dard-o-alam mein rakhte ho

hamin to hain wo jo aah-o-fughan mein rahte hain

mujhe to aap se matlab hai chand suraj kaun

wo un ko chahenge jo aasman mein rahte hain

kidhar kidhar ke chale aate hain ye be-wahdat

kahan kahan ke tumhaare makan mein rahte hain

umid ranj alam zabt dard sabr qalaq

ye sab hamare dil-e-na-tawan mein rahte hain

hazaron kaam hain aise bhi dekh ai ghafil

ki baad marg bhi log is jahan mein rahte hain

KHuda samajh le lagane bujhane walon ko

ye KHwah-maKHwah yahan mein wahan mein rahte hain

ishaare aap ki abru ke koi kya jaane

ki kitne zahr ke tir is kaman mein rahte hain

hamari KHas taraqqi hai KHana-virani

kabhi makan mein the ab la-makan mein rahte hain

agar samajh hai to dil de ke lutf-e-zist uTha

hazar faede us ek ziyan mein rahte hain

KHayal-e-dost mein rahte hain ai safi' jab tak

to is jahan mein na hum us jahan mein rahte hain