jo kahte ho chalen hum bhi tere hamrah bismillah

jo kahte ho chaleñ ham bhī tire hamrāh bismillāh

phir is meñ der kyā aur pūchhnā kyā vaah bismillāh

qadam is naaz se rakhtā huā aatā hai mahfil meñ

ki ahl-e-bazm sab kahte haiñ bismillāh bismillāh

lagā.ī us ne jo jo teġh abrū kī mire dil par

lab-e-har-zaḳhm se niklī bajā.e aah bismillāh

shab-e-mah meñ jo kal Tuk Dagmagāyā vo to sab anjum

vahīñ bole ḳhudā-hāfiz pukārā maah bismillāh

vo jis dam nusḳha-e-nāz-o-adā āġhāz kartā hai

to ham kahte haiñ ik ik aan par vallāh bismillāh

jo us kī chaah kā jī meñ irāda hai to bas ai dil

mubārak hai tujhe jā shauq se tū chaah bismillāh

'nazīr' us dilrubā mahbūb chanchal se lagā kar dil

hameñ kahnā paḌā hai dam-ba-dam allāh bismillāh

jo kahte ho chalen hum bhi tere hamrah bismillah

phir is mein der kya aur puchhna kya wah bismillah

qadam is naz se rakhta hua aata hai mahfil mein

ki ahl-e-bazm sab kahte hain bismillah bismillah

lagai us ne jo jo tegh abru ki mere dil par

lab-e-har-zaKHm se nikli bajae aah bismillah

shab-e-mah mein jo kal Tuk Dagmagaya wo to sab anjum

wahin bole KHuda-hafiz pukara mah bismillah

wo jis dam nusKHa-e-naz-o-ada aaghaz karta hai

to hum kahte hain ek ek aan par wallah bismillah

jo us ki chah ka ji mein irada hai to bas ai dil

mubarak hai tujhe ja shauq se tu chah bismillah

'nazir' us dilruba mahbub chanchal se laga kar dil

hamein kahna paDa hai dam-ba-dam allah bismillah