jo la-mazhab ho usko millat-o-mashrab se kya matlab

jo lā-maz.hab ho us ko millat-o-mashrab se kyā matlab

mirā mashrab hai rindī riñd ko maz.hab se kyā matlab

kitāb-e-dars-e-majnūñ mus.haf-e-ruḳhsār-e-lailā hai

harīf-e-nukta-dān-e-ishq ko maktab se kyā matlab

hasīnān-e-do-ālam meñ hai jalva husn-e-yaktā kā

nazar meñ husn-e-yaktā jab huā un sab se kyā matlab

hamārā hosh har-dam āshnā-e-nahnu-aqrab hai

huzūrī jis ko hāsil ho use yārab se kyā matlab

tamannā.eñ bar aa.iiñ apnī tark-e-mudda.ā ho kar

huā dil be-tamannā ab rahā matlab se kyā matlab

hamāre arsa-e-shatrañj meñ hai shaah dīvāna

jise hāsil ho āzādī use ardab se kyā matlab

hamārā sajda hai har gaam par pīr-e-tarīqat ko

sulūk-e-ishq meñ sar hai qadam markab se kyā matlab

hameñ to yaar se matlab hai 'sāhir' aur yaarī se

hamārā yaar aur aġhyār ke matlab se kyā matlab

jo la-mazhab ho us ko millat-o-mashrab se kya matlab

mera mashrab hai rindi rind ko mazhab se kya matlab

kitab-e-dars-e-majnun mushaf-e-ruKHsar-e-laila hai

harif-e-nukta-dan-e-ishq ko maktab se kya matlab

hasinan-e-do-alam mein hai jalwa husn-e-yakta ka

nazar mein husn-e-yakta jab hua un sab se kya matlab

hamara hosh har-dam aashna-e-nahnu-aqrab hai

huzuri jis ko hasil ho use yarab se kya matlab

tamannaen bar aain apni tark-e-muddaa ho kar

hua dil be-tamanna ab raha matlab se kya matlab

hamare arsa-e-shatranj mein hai shah diwana

jise hasil ho aazadi use ardab se kya matlab

hamara sajda hai har gam par pir-e-tariqat ko

suluk-e-ishq mein sar hai qadam markab se kya matlab

hamein to yar se matlab hai 'sahir' aur yari se

hamara yar aur aghyar ke matlab se kya matlab