jo mere bas mein hai us se ziyaada kya karna

jo mere bas meñ hai us se ziyāda kyā karnā

safar to karnā hai us kā irāda kyā karnā

bas ek rañg hai dil meñ kisī ke hone se

ab apne-āp ko is se bhī saada kyā karnā

jab apnī aag hī kaafī hai mere jiine ko

to mahr o maah se bhī istifāda kyā karnā

tire laboñ ke sivā kuchh nahīñ mayassar jab

so fikr-e-sāġhar-o-sāqī-o-bāda kyā karnā

tamām kashtiyāñ sāhil pe haiñ abhī Thahrī

abhī se in ko jalāne kā va.ada kyā karnā

jo mere bas mein hai us se ziyaada kya karna

safar to karna hai us ka irada kya karna

bas ek rang hai dil mein kisi ke hone se

ab apne-ap ko is se bhi sada kya karna

jab apni aag hi kafi hai mere jine ko

to mahr o mah se bhi istifada kya karna

tere labon ke siwa kuchh nahin mayassar jab

so fikr-e-saghar-o-saqi-o-baada kya karna

tamam kashtiyan sahil pe hain abhi Thahri

abhi se in ko jalane ka wada kya karna