jo misl-e-tir chala tha kaman sa KHam hai

jo misl-e-tīr chalā thā kamān sā ḳham hai

nigāh-e-dost meñ tāsīr-e-ism-e-āzam hai

ḳhushā ki vo haiñ mire rū-ba-rū ba-nafs-e-nafīs

zahe ki aaj mirī aarzū mujassam hai

muhīt-e-husn-e-karāñ-tā-karāñ nahīñ na sahī

bisāt-e-shīsha-e-dil jis qadar hai tāham hai

anā-pasand anā ke nashe meñ bhuul ga.e

ye shahd vo hai ki jis ke ḳhamīr meñ sam hai

havā se kartā hai bāteñ tirī mahak pā kar

tire ġhazāl-e-junūñ meñ balā kā dam-ḳham hai

ye rañg-o-nūr ye ḳhushbū ye kaif-sāmānī

harīm-e-nāz hai yā ālimoñ kā aalam hai

na jā tabassum-e-lab-hā-e-ḳhushk par ai dost

hañsī nahīñ ye taraqqī pasand mātam hai

to kyā charāġh-e-tamannā kā maiñ muhāfiz huuñ

jab un ko fikr nahīñ hai yahīñ kise ġham hai

mirā mizāj hai yāroñ pe vaar duuñ ḳhud ko

mirā vajūd bhī añgushtarī kā nīlam hai

dhuāñ dhuāñ nazar aatī hai bazm-e-fan 'ġhausī'

yahāñ charāġh ziyāda haiñ raushnī kam hai

jo misl-e-tir chala tha kaman sa KHam hai

nigah-e-dost mein tasir-e-ism-e-azam hai

KHusha ki wo hain mere ru-ba-ru ba-nafs-e-nafis

zahe ki aaj meri aarzu mujassam hai

muhit-e-husn-e-karan-ta-karan nahin na sahi

bisat-e-shisha-e-dil jis qadar hai taham hai

ana-pasand ana ke nashe mein bhul gae

ye shahd wo hai ki jis ke KHamir mein sam hai

hawa se karta hai baaten teri mahak pa kar

tere ghazal-e-junun mein bala ka dam-KHam hai

ye rang-o-nur ye KHushbu ye kaif-samani

harim-e-naz hai ya aalimon ka aalam hai

na ja tabassum-e-lab-ha-e-KHushk par ai dost

hansi nahin ye taraqqi pasand matam hai

to kya charagh-e-tamanna ka main muhafiz hun

jab un ko fikr nahin hai yahin kise gham hai

mera mizaj hai yaron pe war dun KHud ko

mera wajud bhi angushtari ka nilam hai

dhuan dhuan nazar aati hai bazm-e-fan 'ghausi'

yahan charagh ziyaada hain raushni kam hai