jo muddaa hai dilon ka yahan nahin milta

jo mudda.ā hai diloñ kā yahāñ nahīñ miltā

jahān-e-rāz hai rāz-e-jahāñ nahīñ miltā

jo kaifiyat hai ḳhamoshī meñ vo bayāñ meñ nahīñ

bayāñ karūñ bhī to lutf-e-bayāñ nahīñ miltā

junūñ kī raah meñ ye kaun sā maqām aayā

ki ab surāġh-e-zamān-o-makāñ nahīñ miltā

na ab zamīñ kī ḳhabar hai na āsmāñ kī ḳhabar

mire hī naqsh-e-qadam kā nishāñ nahīñ miltā

ḳhizāñ meñ ahl-e-nasheman ko thā bahār kā ġham

bahār aa.ī to ab āshiyāñ nahīñ miltā

har ek yuuñ to hai ādāb-e-ishq se vāqif

mire junūñ kā magar rāzdāñ nahīñ miltā

mohabbatoñ meñ kamī kyā huī ki siine meñ

vo be-qarār dil-e-bad-gumāñ nahīñ miltā

hanūz ḳhatm nahīñ justuju-e-māh-vishāñ

abhī to zer-e-qadam āsmāñ nahīñ miltā

fazā-e-lāla-o-gul sard hotī jaatī hai

'jamāl' sā koī sho.ala-bayāñ nahīñ miltā

jo muddaa hai dilon ka yahan nahin milta

jahan-e-raaz hai raaz-e-jahan nahin milta

jo kaifiyat hai KHamoshi mein wo bayan mein nahin

bayan karun bhi to lutf-e-bayan nahin milta

junun ki rah mein ye kaun sa maqam aaya

ki ab suragh-e-zaman-o-makan nahin milta

na ab zamin ki KHabar hai na aasman ki KHabar

mere hi naqsh-e-qadam ka nishan nahin milta

KHizan mein ahl-e-nasheman ko tha bahaar ka gham

bahaar aai to ab aashiyan nahin milta

har ek yun to hai aadab-e-ishq se waqif

mere junun ka magar raazdan nahin milta

mohabbaton mein kami kya hui ki sine mein

wo be-qarar dil-e-bad-guman nahin milta

hanuz KHatm nahin justuju-e-mah-wishan

abhi to zer-e-qadam aasman nahin milta

faza-e-lala-o-gul sard hoti jati hai

'jamal' sa koi shoala-bayan nahin milta