jo muhibba-e-wafa hain wo wafa karte hain

jo muhibbā-e-vafā haiñ vo vafā karte haiñ

kuchh ġharaz is se nahīñ koī jafā karte haiñ

ḳhūgar-e-dard haiñ sab kuchh vo sahā karte haiñ

dushmanoñ se nahīñ matlab ki vo kyā karte haiñ

ham jigar thaam ke jab āh-e-rasā karte haiñ

ik qayāmat meñ qayāmat hī bapā karte haiñ

chāragar kā ho bhalā kaun rahīn-e-minnat

ham to ḳhud apnī hī zaḳhmoñ ko siyā karte haiñ

saaz ho aish kā yā sūr-e-musībat dam-sāz

ab to har haal meñ ham shukr adā karte haiñ

aap sharmā ga.e kyuuñ dekh ke raqs-e-bismil

kyā kahīñ tīr-e-nazar chal ke ḳhatā karte haiñ

ātish-e-ishq-e-vatan rakhte haiñ dil meñ raushan

apnī hī aag meñ jal jal ke bujhā karte haiñ

har hubāb-e-lab-e-jū jalva-gah-e-hastī hai

naqsh ban ban ke zamāne se miTā karte haiñ

'shauq' sā banda-e-āzād zamāne meñ kahāñ

aaj sunte haiñ ki vo yād-e-ḳhudā karte haiñ

jo muhibba-e-wafa hain wo wafa karte hain

kuchh gharaz is se nahin koi jafa karte hain

KHugar-e-dard hain sab kuchh wo saha karte hain

dushmanon se nahin matlab ki wo kya karte hain

hum jigar tham ke jab aah-e-rasa karte hain

ek qayamat mein qayamat hi bapa karte hain

chaaragar ka ho bhala kaun rahin-e-minnat

hum to KHud apni hi zaKHmon ko siya karte hain

saz ho aish ka ya sur-e-musibat dam-saz

ab to har haal mein hum shukr ada karte hain

aap sharma gae kyun dekh ke raqs-e-bismil

kya kahin tir-e-nazar chal ke KHata karte hain

aatish-e-ishq-e-watan rakhte hain dil mein raushan

apni hi aag mein jal jal ke bujha karte hain

har hubab-e-lab-e-ju jalwa-gah-e-hasti hai

naqsh ban ban ke zamane se miTa karte hain

'shauq' sa banda-e-azad zamane mein kahan

aaj sunte hain ki wo yaad-e-KHuda karte hain