jo musht-e-KHak ho us KHak-dan ki baat karo

jo musht-e-ḳhāk ho us ḳhāk-dāñ kī baat karo

zamīñ pe rah ke na tum āsmāñ kī baat karo

kasī kī tābish-e-ruḳhsār kā kaho qissa

kisī ke gesū-e-ambar-fishāñ kī baat karo

nahīñ huā jo tulūa āftāb to filhāl

qamar kā zikr karo kahkashāñ kī baat karo

rahegā mashġhala-e-yād-e-raftagāñ kab tak

guzar rahā hai jo us kārvāñ kī baat karo

yahī jahān hai hañgāma-zār-e-sūd-o-ziyāñ

yahīñ ke suud yahīñ ke ziyāñ kī baat karo

ab is chaman meñ na sayyād hai na hai gulchīñ

karo to ab sitam-e-bāġhbāñ kī baat karo

jo musht-e-KHak ho us KHak-dan ki baat karo

zamin pe rah ke na tum aasman ki baat karo

kasi ki tabish-e-ruKHsar ka kaho qissa

kisi ke gesu-e-ambar-fishan ki baat karo

nahin hua jo tulua aaftab to filhaal

qamar ka zikr karo kahkashan ki baat karo

rahega mashghala-e-yaad-e-raftagan kab tak

guzar raha hai jo us karwan ki baat karo

yahi jahan hai hangama-zar-e-sud-o-ziyan

yahin ke sud yahin ke ziyan ki baat karo

ab is chaman mein na sayyaad hai na hai gulchin

karo to ab sitam-e-baghban ki baat karo