jo na ho dard-ashna wo sarKHushi kis kaam ki

jo na ho dard-āshnā vo sarḳhushī kis kaam kī

shā.irī tamsīl yā sūrat-garī kis kaam kī

ġham jo auroñ kā ho apnā ġham samajh kar lījiye

varna dil kā soz āñkhoñ kī namī kis kaam kī

ek jaise hoñ agar sañg-o-samar kyā dekhnā

sehn-e-yaḳh-basta meñ koī raushnī kis kaam kī

ḳhāk-dān-e-tīra meñ ik ālam-e-raushan bhī hai

be-junūñ bhī ye munavvar āgahī kis kaam kī

vo to ik sailāb thā sab kuchh bahā kar le gayā

naam kī taḳhtī sar-e-dīvār thī kis kaam kī

rañj harf-e-nā-shunīda āsmāñ nā-āshnā

ai havā-e-dard āshufta-sarī kis kaam kī

irtibāt-e-chashm-o-lab kā bhī koī sāmāñ to ho

varna us ḳhāl-e-siyah kī dilkashī kis kaam kī

jo na ho dard-ashna wo sarKHushi kis kaam ki

shairi tamsil ya surat-gari kis kaam ki

gham jo auron ka ho apna gham samajh kar lijiye

warna dil ka soz aankhon ki nami kis kaam ki

ek jaise hon agar sang-o-samar kya dekhna

sehn-e-yaKH-basta mein koi raushni kis kaam ki

KHak-dan-e-tira mein ek aalam-e-raushan bhi hai

be-junun bhi ye munawwar aagahi kis kaam ki

wo to ek sailab tha sab kuchh baha kar le gaya

nam ki taKHti sar-e-diwar thi kis kaam ki

ranj harf-e-na-shunida aasman na-ashna

ai hawa-e-dard aashufta-sari kis kaam ki

irtibaat-e-chashm-o-lab ka bhi koi saman to ho

warna us KHal-e-siyah ki dilkashi kis kaam ki