jo nazar aata nahin diwar mein dar aur hai

jo nazar aatā nahīñ dīvār meñ dar aur hai

in sitam-gāroñ ke pīchhe ik sitamgar aur hai

jo nazar aatā nahīñ raste kā patthar aur hai

maiñ nahīñ huuñ mere andar ek ḳhud-sar aur hai

in fazāoñ meñ magar merā guzar mumkin nahīñ

merī manzil aur hai merā muqaddar aur hai

ham haiñ tūfān-e-havādis meñ hameñ mālūm hai

tum samajh sakte nahīñ sāhil kā manzar aur hai

bojh terī bevafā.ī kā uThā letā magar

ik tamannā tujh se baḌh kar dil ke andar aur hai

kuchh ta.alluq hī nahīñ jis kā mire hālāt se

mere mohsin terā ik ehsān mujh par aur hai

aap se mil kar mujhe mahsūs ye hone lagā

ye mirā paikar nahīñ hai merā paikar aur hai

merī barbādī kā baa.is sirf nādārī nahīñ

ek sāmān-e-aziyyat is se baḌh kar aur hai

raushnī pahle bhī hotī thī magar 'sultān-rashk'

āftāb-e-subah-e-āzādī kā manzar aur hai

jo nazar aata nahin diwar mein dar aur hai

in sitam-garon ke pichhe ek sitamgar aur hai

jo nazar aata nahin raste ka patthar aur hai

main nahin hun mere andar ek KHud-sar aur hai

in fazaon mein magar mera guzar mumkin nahin

meri manzil aur hai mera muqaddar aur hai

hum hain tufan-e-hawadis mein hamein malum hai

tum samajh sakte nahin sahil ka manzar aur hai

bojh teri bewafai ka uTha leta magar

ek tamanna tujh se baDh kar dil ke andar aur hai

kuchh talluq hi nahin jis ka mere haalat se

mere mohsin tera ek ehsan mujh par aur hai

aap se mil kar mujhe mahsus ye hone laga

ye mera paikar nahin hai mera paikar aur hai

meri barbaadi ka bais sirf nadari nahin

ek saman-e-aziyyat is se baDh kar aur hai

raushni pahle bhi hoti thi magar 'sultan-rashk'

aaftab-e-subah-e-azadi ka manzar aur hai