jo nazar se bayan hoti hai

jo nazar se bayān hotī hai

kyā hasīñ dāstān hotī hai

pattharoñ ko na Thokareñ maaro

pattharoñ meñ bhī jaan hotī hai

jis ko chhū do tum apne qadmoñ se

vo zamīñ āsmān hotī hai

be-piye bhī surūr hotā hai

jab mohabbat javān hotī hai

zindagī to usī kī hai jis par

vo nazar mehrbān hotī hai

jitne ūñche ḳhayāl hote haiñ

utnī ūñchī uḌaan hotī hai

aarzū kī zabāñ nahīñ hotī

aarzū be-zabān hotī hai

jis meñ shāmil ho talḳhi-e-ġham bhī

kitnī mīThī vo taan hotī hai

in kī nazroñ kā ho fusūñ jis meñ

vo ġhazal kī zabān hotī hai

ḳhaar kī zindagī-e-be-raunaq

phuul kī pāsbān hotī hai

kaun detā hai ruuh ko āvāz

jab haram meñ azaan hotī hai

ishq kī zindagī 'hafīz' na pūchh

har ghaḌī imtihān hotī hai

jo nazar se bayan hoti hai

kya hasin dastan hoti hai

pattharon ko na Thokaren maro

pattharon mein bhi jaan hoti hai

jis ko chhu do tum apne qadmon se

wo zamin aasman hoti hai

be-piye bhi surur hota hai

jab mohabbat jawan hoti hai

zindagi to usi ki hai jis par

wo nazar mehrban hoti hai

jitne unche KHayal hote hain

utni unchi uDan hoti hai

aarzu ki zaban nahin hoti

aarzu be-zaban hoti hai

jis mein shamil ho talKHi-e-gham bhi

kitni miThi wo tan hoti hai

in ki nazron ka ho fusun jis mein

wo ghazal ki zaban hoti hai

KHar ki zindagi-e-be-raunaq

phul ki pasban hoti hai

kaun deta hai ruh ko aawaz

jab haram mein azan hoti hai

ishq ki zindagi 'hafiz' na puchh

har ghaDi imtihan hoti hai