jo paD gai thi girah dil mein kholte hum bhi

jo paḌ ga.ī thī girah dil meñ kholte ham bhī

vo baat kartā to kuchh us se bolte ham bhī

havā ko kis ne chhuā hai jo tujh ko chhū paate

ḳhalā meñ phirte haiñ rasta TaTolte ham bhī

kahāñ pe Thahreñ ki mānind-e-barg-e-āvāra

havā ke dosh pe phirte haiñ Dolte ham bhī

añdherā shahr kī galiyoñ kā ghar meñ dar aatā

zarā jo raat ko darvāza kholte ham bhī

'qamar' ye lutf na jiine kā phir hameñ aatā

lahū maiñ zahr agar ḳhud na gholte ham bhī

jo paD gai thi girah dil mein kholte hum bhi

wo baat karta to kuchh us se bolte hum bhi

hawa ko kis ne chhua hai jo tujh ko chhu pate

KHala mein phirte hain rasta TaTolte hum bhi

kahan pe Thahren ki manind-e-barg-e-awara

hawa ke dosh pe phirte hain Dolte hum bhi

andhera shahr ki galiyon ka ghar mein dar aata

zara jo raat ko darwaza kholte hum bhi

'qamar' ye lutf na jine ka phir hamein aata

lahu main zahr agar KHud na gholte hum bhi