jo pahchan aae to pahchan jae

jo pahchān aa.e to pahchān jaa.e

mujhe jaan jaa.e tumheñ jaan jaa.e

mirā diin jaa.e ki īmān jaa.e

vo man jaa.e mujh se mirī maan jaa.e

agar jaan jaatī hai to jaan jaa.e

vo jān-e-taġhāful magar jaan jaa.e

vo insān ke dil meñ jab ghar banā.eñ

kahāñ ghar banāne ko insān jaa.e

ye inkār-o-iqrār chhoḌo ki in se

na īmān aa.e na īmān jaa.e

tumhārī tamannā ko dil se nikāleñ

kahāñ ghar se bāhar ye mehmān jaa.e

na ho tum vahāñ to junūñ se na hogā

ki baiThe biThā.e bayābān jaa.e

'zahīn' un ko un se alag dekhnā hai

jahāñ vo na aa.eñ vahāñ dhyān jaa.e

jo pahchan aae to pahchan jae

mujhe jaan jae tumhein jaan jae

mera din jae ki iman jae

wo man jae mujh se meri man jae

agar jaan jati hai to jaan jae

wo jaan-e-taghaful magar jaan jae

wo insan ke dil mein jab ghar banaen

kahan ghar banane ko insan jae

ye inkar-o-iqrar chhoDo ki in se

na iman aae na iman jae

tumhaari tamanna ko dil se nikalen

kahan ghar se bahar ye mehman jae

na ho tum wahan to junun se na hoga

ki baiThe biThae bayaban jae

'zahin' un ko un se alag dekhna hai

jahan wo na aaen wahan dhyan jae