jo rah chalna hai KHud hi chun lo yahan koi rahbar nahin hai

jo raah chalnā hai ḳhud hī chun lo yahāñ koī rāhbar nahīñ hai

yahī haqīqat hai baat maano tumheñ abhī kuchh ḳhabar nahīñ hai

kisī ko sāda-dilī kā badla milā hī kab hai jo ab milegā

vafā bhī duniyā meñ ek shai hai magar vo ab mo'atabar nahīñ hai

na jaane kab ruḳh havā badal de bhaḌak uTheñ phir vo bujhte sho.ale

hirās hai vo fazā pe taarī kahīñ bhī mahfūz ghar nahīñ hai

jo chāhte haiñ chaman ko bāTeñ vo kaise bāTeñge fasl-e-gulshan

bahegā ġhunchoñ kā ḳhuun kitnā unheñ to is kā bhī Dar nahīñ hai

jo pusht pe vaar kar rahe haiñ kaho ki ab sāmne se aa.eñ

jise vo ġhāfil samajh rahe haiñ vo is qadar be-ḳhabar nahīñ hai

na kāmyābī milegī tum ko hameñ miTāne kī koshishoñ meñ

jhukegā jo zālimoñ ke aage vo haq-parastoñ kā sar nahīñ hai

jo bāñTte haiñ matā-e-hastī unheñ ye 'afshāñ zarā batā do

jo maiñ ne māñgā hai haq hai merā mujhe ye kahne meñ Dar nahīñ hai

jo rah chalna hai KHud hi chun lo yahan koi rahbar nahin hai

yahi haqiqat hai baat mano tumhein abhi kuchh KHabar nahin hai

kisi ko sada-dili ka badla mila hi kab hai jo ab milega

wafa bhi duniya mein ek shai hai magar wo ab mo'atabar nahin hai

na jaane kab ruKH hawa badal de bhaDak uThen phir wo bujhte shoale

hiras hai wo faza pe tari kahin bhi mahfuz ghar nahin hai

jo chahte hain chaman ko baTen wo kaise baTenge fasl-e-gulshan

bahega ghunchon ka KHun kitna unhen to is ka bhi Dar nahin hai

jo pusht pe war kar rahe hain kaho ki ab samne se aaen

jise wo ghafil samajh rahe hain wo is qadar be-KHabar nahin hai

na kaamyabi milegi tum ko hamein miTane ki koshishon mein

jhukega jo zalimon ke aage wo haq-paraston ka sar nahin hai

jo banTte hain mata-e-hasti unhen ye 'afshan zara bata do

jo main ne manga hai haq hai mera mujhe ye kahne mein Dar nahin hai