jo raazdar the pahle wo dushman-e-jaan hain

jo rāzdār the pahle vo dushman-e-jāñ haiñ

magar jo dushman-e-jāñ the vo rāzdār hue

gunāh ḳhud hī kiyā ḳhud ko phir sazā de lī

ham apne hāthoñ ka.ī baar sangsār hue

kabhī fasāna sunā kar bhī aañkh nam na huī

tumhāre zikr pe hī aaj ashk-bār hue

har ek chiiz kī is daur meñ sifat badlī

pahāḌ shahr bane shahr kohsār hue

vo paude jin ke sarāpe baḌe mulā.em the

hamāre dekhte lamhoñ meñ ḳhār-dār hue

garebāñ jin pe bharosa thā ham faqīroñ ko

junūñ kī aañch se pal-bhar meñ taar taar hue

baḌhā.eñ un kī taraf dast-e-dostī kyūñ-kar

jo gul-sifat the kabhī 'faḳhr' ab vo ḳhaar hue

jo raazdar the pahle wo dushman-e-jaan hain

magar jo dushman-e-jaan the wo raazdar hue

gunah KHud hi kiya KHud ko phir saza de li

hum apne hathon kai bar sangsar hue

kabhi fasana suna kar bhi aankh nam na hui

tumhaare zikr pe hi aaj ashk-bar hue

har ek chiz ki is daur mein sifat badli

pahaD shahr bane shahr kohsar hue

wo paude jin ke sarape baDe mulaem the

hamare dekhte lamhon mein KHar-dar hue

gareban jin pe bharosa tha hum faqiron ko

junun ki aanch se pal-bhar mein tar tar hue

baDhaen un ki taraf dast-e-dosti kyun-kar

jo gul-sifat the kabhi 'faKHr' ab wo KHar hue