jo raha yun hi salamat mera jazb-e-walihana

jo rahā yuuñ hī salāmat mirā jazb-e-vālihāna

mujhe ḳhud karegā sajda tirā sang-e-āstāna

rah-e-haq ke hādsoñ kā na sunā mujhe fasāna

tirī rahbarī ġhalat thī ki bahak gayā zamāna

maiñ jahān-e-hosh-o-irfāñ ba-libās-e-kāfirāna

ba-hijāb-e-pārsā.ī tū hama-sharāb-ḳhāna

tujhe yaad hai sitamgar koī aur bhī fasāna

vahī zikr-e-āb-o-dāna vahī fikr-e-tā.erāna

mirī zindagī kā mehvar yahī soz-o-sāz-e-hastī

kabhī jazb-e-vālihāna kabhī zabt-e-ārifāna

tirā jazba-e-rifāqat mirā saath kaise degā

ki maiñ zinda-e-kohistāñ tū halāk-e-āshiyāna

mirī bazm-e-fikr meñ hai yahī kashmakash azal se

kabhī chhā ga.ī haqīqat kabhī jam gayā fasāna

vo bajā.e aah 'fārūq' abhī vaah kar rahe haiñ

abhī dard se hai ḳhālī ye navā-e-āshiqāna

jo raha yun hi salamat mera jazb-e-walihana

mujhe KHud karega sajda tera sang-e-astana

rah-e-haq ke hadson ka na suna mujhe fasana

teri rahbari ghalat thi ki bahak gaya zamana

main jahan-e-hosh-o-irfan ba-libas-e-kafirana

ba-hijab-e-parsai tu hama-sharab-KHana

tujhe yaad hai sitamgar koi aur bhi fasana

wahi zikr-e-ab-o-dana wahi fikr-e-taerana

meri zindagi ka mehwar yahi soz-o-saz-e-hasti

kabhi jazb-e-walihana kabhi zabt-e-arifana

tera jazba-e-rifaqat mera sath kaise dega

ki main zinda-e-kohistan tu halak-e-ashiyana

meri bazm-e-fikr mein hai yahi kashmakash azal se

kabhi chha gai haqiqat kabhi jam gaya fasana

wo bajae aah 'faruq' abhi wah kar rahe hain

abhi dard se hai KHali ye nawa-e-ashiqana