jo raqibon ne kaha tu wahi bad-zan samjha

jo raqīboñ ne kahā tū vahī bad-zan samjhā

dost afsos na samjhā mujhe dushman samjhā

nā-tavāñ vo huuñ ki bistar pe mujhe dekh ke aah

tār-e-bistar koī samjhā koī sozan samjhā

teġh-e-qātil jo mohabbat se lagī aa ke gale

taab ko us kī maiñ apnī rag-e-gardan samjhā

apne pājāma-e-kam-ḳhvāb kī har boTī ko

sham.a-rū shab ko charāġh-e-tah-e-dāman samjhā

sur-at-e-ablaq-e-ayyām se ġhāfil thā aah

dam-e-āḳhir maiñ use umr kā tausan samjhā

ḳhār-e-sahrā se chhidī jab kaf-e-pā majnūñ kī

ḳhāk-bezī ko vo ġhirbāl kā rauzan samjhā

kamar-e-yār kā az-bas-ki jo rahtā hai ḳhayāl

dil ko maiñ chīnī-e-mū-dār kā bartan samjhā

gul ko ma.alūm na thī hasti-e-fānī apnī

ai nasīm-e-saharī vaqt-e-shaguftan samjhā

bistar-e-gul se munaqqash jo huā us kā badan

tan-e-nāzuk pe vo phul-kārī kī chipkan samjhā

jīte-jī chāhiye hai āqibat-e-kār kī fikr

fā.eda kyā agar insāñ pas-e-murdan samjhā

mīrzā.ī ko na fariyād ne chhoḌā tā-marg

jīġha-e-sar tujhe ai tesha-e-āhan samjhā

aks-afgan hai tire sāġhar-e-sahbā meñ ye zulf

tū abas ai but-e-mai-kash use nāgan samjhā

sāya-e-zulf ne us ke ye diyā dhokā raat

chalne vāloñ ne jise af.ī-e-rahzan samjhā

chashm ne apnī taraf se to sujhā.ī thī 'nasīr'

dil na par us sitam-ījād kī chitvan samjhā

jo raqibon ne kaha tu wahi bad-zan samjha

dost afsos na samjha mujhe dushman samjha

na-tawan wo hun ki bistar pe mujhe dekh ke aah

tar-e-bistar koi samjha koi sozan samjha

tegh-e-qatil jo mohabbat se lagi aa ke gale

tab ko us ki main apni rag-e-gardan samjha

apne pajama-e-kam-KHwab ki har boTi ko

shama-ru shab ko charagh-e-tah-e-daman samjha

sur-at-e-ablaq-e-ayyam se ghafil tha aah

dam-e-aKHir main use umr ka tausan samjha

KHar-e-sahra se chhidi jab kaf-e-pa majnun ki

KHak-bezi ko wo ghirbaal ka rauzan samjha

kamar-e-yar ka az-bas-ki jo rahta hai KHayal

dil ko main chini-e-mu-dar ka bartan samjha

gul ko malum na thi hasti-e-fani apni

ai nasim-e-sahari waqt-e-shaguftan samjha

bistar-e-gul se munaqqash jo hua us ka badan

tan-e-nazuk pe wo phul-kari ki chipkan samjha

jite-ji chahiye hai aaqibat-e-kar ki fikr

faeda kya agar insan pas-e-murdan samjha

mirzai ko na fariyaad ne chhoDa ta-marg

jigha-e-sar tujhe ai tesha-e-ahan samjha

aks-afgan hai tere saghar-e-sahba mein ye zulf

tu abas ai but-e-mai-kash use nagan samjha

saya-e-zulf ne us ke ye diya dhoka raat

chalne walon ne jise afi-e-rahzan samjha

chashm ne apni taraf se to sujhai thi 'nasir'

dil na par us sitam-ijad ki chitwan samjha