jo samna bhi kabhi yar-e-KHub-ru se hua

jo sāmnā bhī kabhī yār-e-ḳhūb-rū se huā

zamāne bhar kā yurish mujh pe chaar sū se huā

kahā ishāroñ se maiñ ne ki tum pe martā huuñ

jo nutq band mirā un kī guftugū se huā

kisī ko bhī na havas thī halāl hone kī

rivāj-e-shauq-e-shahādat mire gulū se huā

jidhar nigāh kī jalva tirā nazar aayā

kamāl-e-kashf mujhe terī aarzū se huā

khulā na haal kisī par ki kyā mizāj meñ hai

ḳhudā.ī meñ koī vāqif na us kī ḳhū se huā

ajab ghaḌī se garebāñ phaTā thā majnūñ kā

tamām umr na vāqif kabhī rafū se huā

baḌe-baḌoñ ko lagāyā na muñh kabhī maiñ ne

vo zarf huuñ ki na vāqif kabhī subū se huā

vo ḳhud bhī kar ga.e tar āñsuoñ se turbat ko

galī meñ yaar kī madfūn is aabrū se huā

bahār-e-bāġh ko aa.e jo dekhne be-yār

dimāġh aur pareshāñ guloñ kī bū se huā

chaḌhā.e gor-e-ġharībāñ pe gul jo us gul ne

chaman bahisht kā paidā maqām-e-hū se huā

halāl hone ko sayyād se mohabbat kī

qazā jo aa.ī to mānūs maiñ adū se huā

ḳhudā.ī karne lagā yaar be-niyāzī se

baḌā ġhurūr use merī aarzū se huā

jahāñ se mahfil-e-me.arāj meñ huī talabī

bashar kā martaba ye us kī justujū se huā

lagāte haiñ jo sab āñkhoñ se āb-e-zamzam ko

'sharaf' ye faiz kā chashma mirī vazū se huā

jo samna bhi kabhi yar-e-KHub-ru se hua

zamane bhar ka yurish mujh pe chaar su se hua

kaha ishaaron se main ne ki tum pe marta hun

jo nutq band mera un ki guftugu se hua

kisi ko bhi na hawas thi halal hone ki

riwaj-e-shauq-e-shahadat mere gulu se hua

jidhar nigah ki jalwa tera nazar aaya

kamal-e-kashf mujhe teri aarzu se hua

khula na haal kisi par ki kya mizaj mein hai

KHudai mein koi waqif na us ki KHu se hua

ajab ghaDi se gareban phaTa tha majnun ka

tamam umr na waqif kabhi rafu se hua

baDe-baDon ko lagaya na munh kabhi main ne

wo zarf hun ki na waqif kabhi subu se hua

wo KHud bhi kar gae tar aansuon se turbat ko

gali mein yar ki madfun is aabru se hua

bahaar-e-bagh ko aae jo dekhne be-yar

dimagh aur pareshan gulon ki bu se hua

chaDhae gor-e-ghariban pe gul jo us gul ne

chaman bahisht ka paida maqam-e-hu se hua

halal hone ko sayyaad se mohabbat ki

qaza jo aai to manus main adu se hua

KHudai karne laga yar be-niyazi se

baDa ghurur use meri aarzu se hua

jahan se mahfil-e-mearaj mein hui talabi

bashar ka martaba ye us ki justuju se hua

lagate hain jo sab aankhon se aab-e-zamzam ko

'sharaf' ye faiz ka chashma meri wazu se hua