jo sahra hai use kaise samundar likh diya jae

jo sahrā hai use kaise samundar likh diyā jaa.e

ġhazal meñ kis tarah rahzan ko rahbar likh diyā jaa.e

qalam ke dosh par ho imtihāñ kā bojh jis had tak

magar haq to ye hai patthar ko patthar likh diyā jaa.e

kisī in.aam kī ḳhātir na hogā ham se ye hargiz

ki ik shāhīn ko jañgalī kabūtar likh diyā jaa.e

sitam kī dāstāñ kis raushnā.ī se raqam hogī

lahū kī dhaar se daftar kā daftar likh diyā jaa.e

kisānoñ ko mayassar jab nahīñ do vaqt kī roTī

to aise khet ko be-sūd-o-banjar likh diyā jaa.e

hamārī tishnagī se bhī koī masrūr hotā hai

hamārī pyaas ko labrez sāġhar likh diyā jaa.e

qalam ko maiñ ne bhī talvār āḳhir kar liyā 'tālib'

mirī nok-e-qalam ko nok-e-ḳhanjar likh diyā jaa.e

jo sahra hai use kaise samundar likh diya jae

ghazal mein kis tarah rahzan ko rahbar likh diya jae

qalam ke dosh par ho imtihan ka bojh jis had tak

magar haq to ye hai patthar ko patthar likh diya jae

kisi inam ki KHatir na hoga hum se ye hargiz

ki ek shahin ko jangali kabutar likh diya jae

sitam ki dastan kis raushnai se raqam hogi

lahu ki dhaar se daftar ka daftar likh diya jae

kisanon ko mayassar jab nahin do waqt ki roTi

to aise khet ko be-sud-o-banjar likh diya jae

hamari tishnagi se bhi koi masrur hota hai

hamari pyas ko labrez saghar likh diya jae

qalam ko main ne bhi talwar aaKHir kar liya 'talib'

meri nok-e-qalam ko nok-e-KHanjar likh diya jae