jo sarguzisht apni hum kahenge koi sunega to kya karenge

jo sarguzisht apnī ham kaheñge koī sunegā to kyā kareñge

jo yaad ā.eñgī terī bāteñ to chup hī pahroñ rahā kareñge

jo chāho kah lo yahī ḳhushī hai to ham bhī phir kyuuñ gilā kareñge

jo kuchh sunā.egī apnī qismat tumhāre muñh se sunā kareñge

kise ġharaz hai phir aap ko kyuuñ sanam kā bandā kahā kareñge

jo yūñhī ham ko bhulā.eñge vo to ham bhī yād-e-ḳhudā kareñge

abas ye har-dam kā chauñknā hai abas ye uTh uTh ke dekhnā hai

bhalā vo aise hue the kis din vahī to va.ada vafā kareñge

ilāhī qāsid abhī na aa.e ki ye tavaqqo.a bhī hai ġhanīmat

kiyā gar inkār saaf us ne to dil kī taskīn kyā kareñge

lo mil bhī jaao na kuchh tumhārī ḳhatā thī us dam na kuchh hamārī

jo ye hī dil ke muāmle haiñ to yūñhī jhagḌe rahā kareñge

hameñ to dekho ye kyā huā hai ki un ke kahne kā phir yaqīñ hai

vo jo jhuuT yūñhī kahā kareñge adū se yūñhī milā kareñge

sitam kī kiije agar shikāyat to kahte haiñ bas tumheñ bhī dekhā

yahāñ kuchh aisī ġharaz hai kis ko kisī pe ham kyuuñ jafā kareñge

ye sach hai nāseh! na hogā milnā nahīñ hai achchhā na hogā achchhā

phir aap ko kyā burā kaheñge to apne haq meñ burā kareñge

'nizām' taqrīr phir abas hai javāb kuchh us kā de sakoge

vo us kā har baat par ye kahnā ki ham to apnā kahā kareñge

jo sarguzisht apni hum kahenge koi sunega to kya karenge

jo yaad aaengi teri baaten to chup hi pahron raha karenge

jo chaho kah lo yahi KHushi hai to hum bhi phir kyun gila karenge

jo kuchh sunaegi apni qismat tumhaare munh se suna karenge

kise gharaz hai phir aap ko kyun sanam ka banda kaha karenge

jo yunhi hum ko bhulaenge wo to hum bhi yaad-e-KHuda karenge

abas ye har-dam ka chaunkna hai abas ye uTh uTh ke dekhna hai

bhala wo aise hue the kis din wahi to wada wafa karenge

ilahi qasid abhi na aae ki ye tawaqqoa bhi hai ghanimat

kiya gar inkar saf us ne to dil ki taskin kya karenge

lo mil bhi jao na kuchh tumhaari KHata thi us dam na kuchh hamari

jo ye hi dil ke muamle hain to yunhi jhagDe raha karenge

hamein to dekho ye kya hua hai ki un ke kahne ka phir yaqin hai

wo jo jhuT yunhi kaha karenge adu se yunhi mila karenge

sitam ki kije agar shikayat to kahte hain bas tumhein bhi dekha

yahan kuchh aisi gharaz hai kis ko kisi pe hum kyun jafa karenge

ye sach hai naseh! na hoga milna nahin hai achchha na hoga achchha

phir aap ko kya bura kahenge to apne haq mein bura karenge

'nizam' taqrir phir abas hai jawab kuchh us ka de sakoge

wo us ka har baat par ye kahna ki hum to apna kaha karenge