jo shab ko manzar-e-shab tab mein tabdil karte hain

jo shab ko manzar-e-shab taab meñ tabdīl karte haiñ

vo lamhe niind ko bhī ḳhvāb meñ tabdīl karte haiñ

jo aañsū dard kī gahrā.iyoñ meñ Duub jaate haiñ

vahī āñkhoñ ko bhī girdāb meñ tabdīl karte haiñ

kisī jugnū ko ham jab raat kī zīnat banāte haiñ

zarā sī raushnī mahtāb meñ tabdīl karte haiñ

agar mil kar baras jaa.eñ yahī bikhre hue bādal

to phir sahrāoñ ko sailāb meñ tabdīl karte haiñ

jo mumkin ho to un bhūle hue lamhāt se bachnā

jo aksar ḳhuun ko zahrāb meñ tabdīl karte haiñ

yahī qatre banāte haiñ kabhī to ghaas par motī

kabhī shabnam ko ye sīmāb meñ tabdīl karte haiñ

kahīñ dekhī nahīñ ai 'shād' ham ne aisī ḳhush-hālī

chalo is mulk ko punjab meñ tabdīl karte haiñ

jo shab ko manzar-e-shab tab mein tabdil karte hain

wo lamhe nind ko bhi KHwab mein tabdil karte hain

jo aansu dard ki gahraiyon mein Dub jate hain

wahi aankhon ko bhi girdab mein tabdil karte hain

kisi jugnu ko hum jab raat ki zinat banate hain

zara si raushni mahtab mein tabdil karte hain

agar mil kar baras jaen yahi bikhre hue baadal

to phir sahraon ko sailab mein tabdil karte hain

jo mumkin ho to un bhule hue lamhat se bachna

jo aksar KHun ko zahrab mein tabdil karte hain

yahi qatre banate hain kabhi to ghas par moti

kabhi shabnam ko ye simab mein tabdil karte hain

kahin dekhi nahin ai 'shad' hum ne aisi KHush-haali

chalo is mulk ko punjab mein tabdil karte hain